U Symbood Montri Rangbah ka jylla, u Prestone Tynsong da ong u wa neini chaphrang ka sorkar daw thooh ko ya ki laad wow su bait ya ka tulop kiwa sikai SSA man ka 3 bnai. Ya ini da pysñiaw u leh hakhmat kiwa yahkhmat ka MSSASA kiwa da yachem ynne i janmiet hadien i yakhih sahmiet yong ki nadooh ka 18 tarik uni u bnai.
Hawa yaklam wa kiwa pathai khubor, da ong u wa i yachem da man iwa jop, wei ka sorkar da kyntu ko ya ki wow pyndam noh ya i yakhih, neibhah ka sorkar daw sai ko hadooh T. 122 Klur wow su ya ka tulop kiwa sikai neibynta 4 bnai.
Heiyatoh wa i dawa pynku ya ka tulop, u Prestone da ong u wa ka sorkar da yaklam ko wa kiwa mihkhmat ka SSA neibynta wow bichaar yeiwa emkaam yong waroh ki skur nadooh ki bor pynlai wa kiwa sikai, ka sorkar da rai ko leh wow thung da ka Education Commission, wei kani ka Commission daw bichaar ko yeiwa emkaam ki skur.
Da ong u wa i pynkhreh wow mynjur ya ka Commission da ka Dhab ki Montri (Cabinet) da lai i chaphrang. Da ong u wa lyngba ka Commission, waroh ki seiñ yong kiwa sikai næ kiwa pynlai skur u phah ki yeiwa emkaam cha ka, wei daw e yumut won ko cha ka sorkar wow leh yeiwa emkaam.
