Ha i lai yachem kiwa yahkhmat ka Dorbar Ki Waheh Kur Ri Jaiñtia ya u CEM ka JHADC, u Thombor Shiwat ha kamra krehkaam yong oo ynne ka sngi neibynta u pynkynmoo ya ka chithi kawa dadep phah ki cha oo nadooh u snem 2024, itæ hajrong wow tipmit noh ya ki jait Kur wa dadep phah pyrtuid cha ka Council kiwa haap hapoh u pood u ang yong ka.
Neiliang u CEM khana u wa ka Council dadep chong yalang ko hapoh ka Customary Committee neibynta u bichaar bniah ya ki jait Kur wa da wan pynpsiah pyrtuid.
Da khana u leh wa hei sakhiat ka Council nadooh u snem 2024 dadep e ko i pynbna paidbah deiwa khut ya waroh ki jait kur wa em ha Ri-loom Jaiñtia wow wan pynpsiah noh ki yei pyrtuid ka Seiñ Kur yong ki kamjooh kiwa yahkhmat Seiñ Kur deilang i pyrtuid ki kur wa kynthup hapoh ka Seiñ Kur yong ki, khnang yow tipmit noh da ka Council, tangwa neidaw wa ki leh ym ye ki wow pynpoi biang por, da paan por ki wei ini da man i daw wa slem.
Kamtæ hadien wa da kut i por pdiang wow pynpsiah pyrtuid, lyngba ka Customary Committee da ya chong yalang ki yow bichaar bniah.
Heini i chong bichaar ong u wa da rai wa ya ki kur ki Pnar wa em ha Ri-loom Jaiñtia da mynjur wow pynlai bait chakhmat katwa neibynta ki jait Kur Hadem, Biate won neidaw wa em ki jait kur wym em che bha ki wei ki wym jooh sñiaw leh ha Ri Jaiñtia kamtæ da rai ki wow pynsahteiñ chwa, wei wow leh yei takit bniah lada toh kiwa ye u pdiang næ ymtoh.
Neiliang kiwa yahkhmat ka Dorbar Ki Waheh Kur Ri Jaiñtia da sya wei kyntu ki ya u CEM wow tipmit noh chwa ya kitu kiwa da pynpsiah pyrtuid khnang yow pynsuk ya u DC hawa e Schedule Tribe, kamtæ u CEM da kular u wow e chwa dei thoh yei pyrtuid ki Kur wa dadep bichaar wei pdiang ka Council hanla ym pu em man aiñ leh.
Discussion about this post