Shillong: Ka sorkar jylla ynne ka sngi da rai ko wow tipmit wei wow e laad wow pynlai yaw noh ya i Wine wa da chna hi da ki soh hapoh ka jylla, wei da ini i tipmit ka sorkar daw chna noh leh ya ki kyndon heiwa ki bru u ye ki wow chna hi ya ki Wine wei wow pynlai yaw ya ki.
U Montri Rangbah ka jylla, u Conrad K Sangma da ong u wa ini i rai yong ka sorkar toh yow pyllait na i sepai ki soh ki pe ki warep yong ka jylla, deiwa ong leh wa lyngba ini i tipmit noh ya ki Wine wa chna hi daw yarap wow kyntu ya i yoh i kot yong kiwa chong chnong wei daw wailaad ko leh wow seiñ khih kamjooh i yoh kaam kiwa boon ki khynroo.
Ha i jooh i por da pyntip u wa ka sorkar da chna ko leh ya ki kyndon wa kitu kiwa thmu wow chna hi ya i Wine daw hap wow yohbor namo daka License na ka sorkar ha i dor T. 7500 kawa hap wow pynthymme man-u-snem, deiwa ong leh wa ka bai khajna neibynta chi synduk i Wine, ka sorkar daw chim ko T.100, katwa ya ka dan Value Added Tax da pyllait wei ym emkaam wow su.
Ha iwi i liang u Conrad da pyntip u leh wa kynhun Montri ynne ka sngi da mynjur ko leh wow pynkylla (Amendment) ya ka Meghalaya Minerals Cess Act, 1988, wei lyngba ini i pynkylla da pynpsiah chooh chooh sa 14 jait ki marpoh khyndaw hapoh kani ka aiñ, heiwa da pyntip u wa ha kini ki snem kiwa da lai da chim ya ka Cess du ya u moochuni, mooyong wa u moolaiñ.
Da ong u wa da i pynpsiah thymme ya kini ki 14 tylli ki marpoh khyndaw, daw yarap ya ka sorkar hei yoh wow chim dan heiwa da ong u wa ha ka mang tyngka yong u snem 2017-2018, i yoh na ka Cess da man ko du T. 48 klur wei da ini i pynpsiah thymme ya ki 14 jait ki marpoh khyndaw i yoh na ka Cess da antaad u poi ko cha ka T. 73 klur ha ka mang tyngka yong u snem 2019-2020.
