U Montri Rangbah ka Arunachal Pradesh u Pema Khandu da pynsñiaw u yei sñiawngooh ya u Montri Rangbahdooh ka ri u Narendra Modi yei mynjur u wow pynkylla wei wow thap chooh ki pyrtuid ki jaitbru yow tipmit ya ki kam ki Scheduled Tribe ka jylla.
Ka Union Cabinet ynnin ka 14 tarik da rai ko wow kynthup lang ya ki pyrtuid ki Monpa, Sajolang (Miji), Sartang, Tai Khamti, Mishmi -Kaman (Miju Mishmi), Idu (Mishmi) wa ki Taraon (Digaru Mishmi) heithaw ki ”Mishmi, Idu, Taraon” wa Nocte, Tangsa, Tutsa wa Wancho hei thaw kiwon kiwon ki “Naga tribe” ki wow em pyrtuid noh hapoh ka Constitution ST List.
Ya kani ka (ST) Order (Amendment) Bill, 2021 daw wanrah hapoh ka Parliament.
Ini mut wa i pyrtuid kiwa da thoh bakla u pynbait noh ki kam ka Khampti Tribe kawa daw thoh noh kam ka Tai Khamti, katwa ya i pyrtuid ki Mishmi- Kaman (Miju Mishmi), Idu (Mishmi) wa Taraon (Digaru Mishmi) leh daw kynthup ya ki hapoh ka ST List.
Daw kynthup leh yei pyrtuid ki Monpa, Memba, Sartang wa Sajolang heithaw ki Momba.
Ka Cabinet da mynjur ko leh wow tipmit ya ki Nocte, Tangsa, Tutsa wa ki Wancho hapoh ka Constitution ST heiwa thaw wa da jooh thoh ”Any Naga tribe”.
Neiliang u Union Law & Justice Minister Kiren Rijiju, uwa man kam u MP ka Arunachal East Parliamentary Constituency, da e khublei u ya u Narendra Modi ya ini wa da leh u.
“Hadien 74 snem i yoh laitlooid, kini ki jaitbru da yoh ki yei hok yong ki,” da ong u Rijiju.
