U Montri ka chnat Kaam Pohyung ka jylla, u Lahkmen Rymbui da pyntip u wa ka takit hajrong i yap ki 6 ngut kiwa mylla tih mooyong ha East Jaiñtia Hills dang lai ko hadooh katni wei ym pu yoh yaka bui (Report) kawa pura.
Da pyntip u wa hadooh katni ka takit man ko du ya ki 17 ngut ki bru, wei pyntip u leh wa ym pu chem ya ki tre yong ka paar mooyong kawa em ha Dienshalau, East Jaiñtia Hills District.
Da pyntip u leh wa katkam ka yutip wa da yoh, katai ka thawa wa jia toh ka yong u Lar Bareh, tangwa kamwa chem wa ym em pyntih u ya katai ka paar mooyong da oo hi, wei katni ka takit dang lai ko neibhah ym ye wow kem kulmar ya ki bru.
U Montri da pyntip u leh wa ka sorkar da chna ko ya kawi ka Committee ar snem nachwa kawa da khlieh da ki Deputy Commissioner yong ki District deilang wa ki pulit yow chem lada em i tih pyrchah yaka aiñ ya u mooyong ha ka jylla, deiwa pynrap wa ka sorkar toh leh u booddien ko ya kani ka Committee wa lada krehkaam ko ne ym em, wei lada yoh yutip, toh wow lai kynreh ha waroh ki thaw wa suba tih pyrchah aiñ ya u mooyong.
Ha kawi ka liang da ong wa i kaam tih mooyong ha ka jylla Meghalaya toh ka karkhana kawa heh bha hachwa yong u snem 2015, wei ym man ko iwa suk ya ka sorkar wow pait ko man ki kdong ki chmiang ka jylla. Da ong u wa kani ka kaam ka khlan bha ko ha West wa South West Khasi Hills, South Garo Hills, East wa West Jaiñtia Hills. Da pynrap u wa katni nadooh wa chah khang ha ka National Green Tribunal, ye u man wa da duna u mooyong wei i dor leh da ku iwa da pynman ya ki bru wow sdang deiwa kreh pyrchah yaka aiñ, tangwa toh i kamram yong waroh kiwa chong chnong wow pyntip kamwa da pynbna da ka chnat Mining and Geology.
U Rymbui da ong chooh chooh u wa ym man iwa suk wow kdoh u khoom yei tih mooyong pyrchah yaka aiñ ha ka jylla, neibhah kamwa man kattæ, i em ki pulit duna bha, deiwa pyntip leh wa ka sorkar ka chimkhia ko ya ini i duna waroh wei wow pyrkhat kammon wow pynkhlan ya ka chnat pulit wei wow yada na i leh pyrchah aiñ ha kiwon kiwon ki liang.
