Shillong: Ka Khasi Hills Autonomous District Council (KHADC) da rai ko wow tynrooh neibynta wow pynkrehkaam noh ya ka Meghalaya Residents Safety and Security Act, 2016, wei wow kyntu leh ya u Lat ka jylla wow e muhor noh ya ka Meghalaya Residents Safety and Security Amendment Bill 2020 wei kamjooh wow dawa na ka sorkar India wow pynkrehkaam ya ka Inner Line Permit ha ka jylla waroh kawi, kamwa da mynjur da ka yung dorbar Meghalaya Legislative Assembly ha u Kmaichonglad (Dec) yong u snem wa da dep.
Hawa wanrah ya kitai ki le tylli ki rai (Resolution), u Chief Executive Member ka KHADC, u Titosstarwell Chyne da ong u wa ki paidbah wa chong chnong em ki ha ka lynga pisa wa em ka chong sier ki tre muluk neidaw wa joor palat kiwa buhai chnong kiwa na baar, wei ka Council ka sñiaw ko wa da toh u wanrah ya ka Resolution wow kyntu ya ka sorkar jylla wow pynkrehkaam noh ya ka MRSSA. Kitæ wa kynthup u chna noh ya ki khyrdop wow pait bniah ya ki bru kiwa psiah cha ka jylla, heiwa neiliang ka KHADC da kyntu ko ya ka sorkar wow pynsmat noh ya katai ka kaam yow chong chngaaiñ ka jaitbru yow lait na i chah tyllep.
Hawa yatoh wa i pynkrehkaam noh ya ka ILP ha Meghalaya, u Titos da ong u wa man ko kawa emkaam ya ka jylla wow pynkrehkaam ya ka Bengal Eastern Frontier Regulations, 1873. Da ong u wa hanla da pyrchang wow chna ya ki aiñ wow yada na i wan kiwa na baar, wei ka KHADC ka em ko ya ki aiñ wow kdoh u khoom yaka khayi pateiñ wa ki kaam ki jaam, tangwa kam ka jaitbru ym pu sñiaw chngaaiñ wei emkaam chooh chooh ki aiñ kiwa khlan neibhah kam ka jaitbru da chah pynyoo bor wei em leh kiwa da kob syndon ya ki aiñ yong ka Council.
Da ong u wa ki khynroo khyllood da pisa lynga ki wei kam kiwa mihkhmat da em ki i jooh i kitkhlieh deiwa wanrah ya kani ka Resolution. U CEM da ong u wa katni da jan dap chisnem wa da mynjur ka Assembly ya ka Resolution wow pynkrehkaam ya ka ILP, wei hadien wa da yoo ya i lai yong ka sorkar cha Delhi wow yachem ya u Home Minister, u Amit Shah, wei ha itai i por da ong dieh lai leh sñiawbha Christmas chwa, tangwa katni da jan wan sa kawi ka Christmas ym pu yoo yei mih soh iyi iyi.
