U Montri ki kaam Pohyung ka jylla uwa man leh u MLA ka United Democratic Party (UDP) na Amlarem, u Lahkmen Rymbui ynne da kyrpaad u na u President ka Meghalaya Pradesh Congress Committee (MPCC) u Vincent H. Pala wow pyrkhat bniah yei daw wa yut ki MLA wa ki heh na ka Congress mar ya chimkti u kam u khlieh ka MPCC.
Neiliang u Lahkmen da ong u wa u Vincent da wan u na Delhi deiwa wanrah ki pynbaad khlem tip yeiwa sakhiat wei pynyoo i yeiwa ym skem wow man u kam u khlieh ka Party.
Ha ki sngi wa dadep neiliang u Vincent da beiñ u ya ka UDP wa man ko ka seiñ wa tieñslah wei kawa yut na waroh i eh i khor wei hajrong ini neiliang u Lahkmen da ong u wa ka Congress da man ko nod neidaw u Vincent donhi deiwa kyntu ya oo wow ngam yillu u chwa wow pynbaad bru.
Heiyatoh wa i chah pynbaad wa u Lahkmen emkti u wow khayi drugs, u Lahkmen da ong u wa hei sakhiat nadooh u 2010 hadooh u 2018, i chah kem drug man i iwa duna tangwa nadooh u 2018 ter ter ka sorkar wa katni ym du i kem tangwa da Charge-Sheet wei da kem ko leh wot ya ki heh.
Chooh chooh u Lahkmen da ong u wa u Vincent da emkti u leh ha waroh ki kaam heipor wa synchaar ka Congress wei neitæ i daw mar chimkti u kam u President heitæ yut wot ki MLA ka Congress chirup wa ki heh yong ka.
Heiyatoh won wa i pynbaad uni u heh ka MPCC wa ka UDP toh kawa baam-tooh dooh na ki Party ha ka sorkar Meghalaya Democratic Alliance (MDA), neiliang u Lahkmen da kyntait u wow jubab yeini deiwa ong wa ym kwah u wow jubab ya ka Party kawa khlem MLA.
Chooh chooh u Lahkmen da ong u wa u Vincent katni da klam u cha sarok donhi neibhah wa ka Congress ym em MLA de ko.
Heijooh i por da ong u wa nachwa jooh man u u bru ka Congress tangwa nei habra i kreh ki heh, katni ka Party da man nod ko deiwa pynrap leh wa hadien ka Election daw man ko hapoh u nod (Minus Zero).
