Ka BJP da e khublei ko ya u Vincent Pala wa kiwi de kiwa da klam hajrong i chah thombor ki Christan ha Chattisgarh, kawa da synchaar da ka Congress, heijooh i por ka BJP da beiñ ko ya u MPCC President, u Vincent Pala uwa da pyrchang wow wanrah yei sñiawyaphær ha ki paidbah deiwa pynbaad ya ka BJP ya ini wa jia.
Ka BJP da ong ko wa da klam bait ko yei emkaam wow pynku lang ya waroh wei da leh ko ya waroh hajrong kani ka yurim wei ym jooh em leh chiliang deiwa pait ya ka niam yong ki bru. Da kdaw wa da em palat 2.5 lak ngut ki warep hapoh Meghalaya kiwa yoh T. 6000 chi snem hapoh ka Bank Account yong ki. Da em leh 1.5 lak tylli ki manyung ha Meghalaya kiwa da yoh umkor. Da em leh 60,000 tylli ki manyung ka Meghalaya kiwa da yoh u chna yung hapoh ka Scheme ka sorkar BJP wei kini kiwa yoh myntoi ha Meghalaya toh kiwa boon kiwa man kam ki Christan iwa pynyoo wa ym jooh em pyndooh yei myntoi du deiwa kheiñ ya ka niam.
Kamtæ da ong wa ka Chattisgarh kawa chah synchaar ha ka Indian National Congress, ki Christan da chah thombor sakhiat ki. Da em boon ki manyung kiwa da hap yut yow sah ha ki Refugee Camp kiwa da chna hapoh ki Stadium wa ha ki yungmane. Ki yungmane toh kiwa da chah tympra chah pynsih, kiwa ngait niam Christan toh kiwa da chah pynmynsoo katwa ka sorkar Congress chong te pait hi-eh ko. Ileh wa i mynsien Christan ha Chattisgarh toh dor i ya ka Congress hawa u Vincent Pala ha Shillong da kam u wow yaleh neibynta ki jaitbru ri-loom wa ki Christan.
Ka BJP da kylli ko leh yei ye wei i thmu u Vincent Pala waka Congress heiwa ka Congress da yohlaad ko wow synchaar ya ka Meghalaya da kiwa boon na ki 50 snem nadooh wa da man kam ka jylla. Lada ka Congress kawa yaleh neibynta ki jaitbru ri-loom wa ki Christan ileh ym poi cheiwon cheiwon ha kini ki 50 snem, kamtæ da hap pyrkhat wa ki bru ka Congress toh ki wym biang wei kiwa da lai luti dei thmu wa sih. Lada sa 5 snem hapoh ka Congress leh ym poi cheiwon cheiwon.
Ka Congress toh kawa tympra bru yow ye u synchaar nadooh nachwa hadooh katni katwa ka BJP won da yahkhmat ko yei synchaar deiwa em ka roi ka paar wei i yahbkla wei i pynsñiaw yaphær toh iwa da wanrah da ka liang pyrchah.
Ka BJP da pynbaad ko ya ka Congress wa kiwi wa pyrchang ki wow pynchit paidbah deiwa klam yei thok pyrchah ya ka Party yow mylliñ yei duna ka roi ka paar, i tlot ka puræ puthi, i wym biang sarok, i hiar ki kaam uiñke suwari wa kiwi kiwi. Wei ka BJP u kreh ko neibynta ki bru ka wei ym wiar ko hadien ka Election wei mih biang hadien 5 snem kamwa leh u Vincent Pala.
Ka khubor wa pynlait da u Ernest Mawries, State President BJP Meghalaya.
