Shillong: Ka Confederation of Hynniewtrep Social Organisation (CoHSO) da pyntip ko wa u symbood montri rangbah ka jylla, u Prestone Tynsong da pyntip u wa ka sorkar daw wanrah noh ko da ka Ordinance heiyatoh wow pynpsiah ya ki kyndon ka Inner Line Permit (ILP) ha ka aiñ Meghalaya Residents Safety and Security Act (MRSSA), 2016, neidaw wa ka sorkar ym ye ko u wanrah ya i pynkylla (Amendment) ha ka aiñ MRSSA ha ka dorbar mang poisa wa dang dep neidaw wa hap pynkut ko khlem toh por wa em ka Election MP.
Ka Confederation of Hynniewtrep Social Organisation (CoHSO) kam i bood dien ya i kular ka sorkar, ynne ka sngi da lai yachem ko wa u Prestone uwa da kular kham nachwa wow pynpsiah ya ki kyndon ka Inner Line Permit (ILP) ha i pynkylla biang ya ka MRSSA, 2016, kawa khlem ye u wanrah ha ka dorbar mang poisa wa da dep.
Hawa yaklam wa ki laad pathai khubor, u Chairman ka CoHSO u Robertjune Kharjahrin da ong u, “U Dy. CM da pynche u wa neidaw wa da pynkut ya ka dorbar du hadien 5 sngi wei wa ka Law wa Political Department ka jylla ym ye ki wow pynmiat pynbiang ya ka Amendment neidaw wa em ki bynta kiwa rap kylleiñ kam ki bynta wa yatoh wa ki tre chnong wei kawa yatoh wa ki Entry wa Exit Point kiwa da tyngkhooh ya ki kyndon wa thymme.
Ka seiñ da ong won ko wa i dawa toh wow booh ya ki Entry wa Exit Point wei manda em ki ym wanrah ko yei eh ka wow sonteri yei psiah i mih.
U Kharjahrin da pyntip chooh chooh u sa iwi wa rap kylleiñ toh wa haap e bor cha ki Dorbar Chnong lyngba ki Village Defence Party (VDP) neibhah i pynkylla ya kani ka aiñ hap kylla sa ya ka Meghalaya Police Act neibynta wow e bor ya ki VDP wow sonteri ki ya ki bru kiwa ym toh ki tre jylla kiwa chong wa sah ha ki chnong khamtam ha ki thaw sor.
“I thmu yong ka sorkar toh wow wanrah lut ya waroh i pynkylla yow bait lang ki wei kamjooh wow pynbait pynbiang syndon ya ka Permanent Residential Certificate (PRC). Em boon kiwa kylleiñ kiwa ka sorkar ym pu ye ko wow rai kawa da pynman wa ym ye de u wanrah ha ka dorbar,” ong u Kharhjahrin.
Da pyntip u leh wa u Prestone da ong u wa lada kammon kammon daw warah ya kani ka Ordinance hapoh uni u bnai wow wan wei ym yang de ya ka dorbar wow man ha u Naisaphra (Aug).
Hawa jubab wa ka Ordinance toh kawa ye u neh du hapoh 6 bnai, u Kharjahrin da ong u wa ka seiñ ym ye yang de ko hadooh wow poi sa kawi ka dorbar, neidaw wa ka sorkar Assam ka hap ko wow pyndep noh ya ka National Register of Citizens (NRC) hapoh u Naiynru (June) uni u snem.
“Ka Ordinance man ko kam ka aiñ hi wa emkaam wow pynskem ya ka ha ka yung dorbar hapoh 6 bnai, wei ym ye yang de ya ka dorbar ka wa daw man hadooh u Naisaphra (Aug) neibhah wa ka Assam leh da pynkhreh ko wow pyndep noh ya ka NRC,” da ong uwa yahkhmat ka CoHSO.
Discussion about this post