Ha ka yalang wa nyngkong ki Montri ka sorkar MDA-II wa da pynman ynne ka sngi, da chim ya ka rai wow pyndam ya ka Ordinance ka aiñ Meghalaya Regulation of Gaming Act 2021.
Hawa yaklam wa kiwa thoh khubor, u Montri Rangbah ka jylla, u Conrad K Sangma da ong u wa ka sorkar daw wanrah noh ko da ka Bill yow pyndam noh ya ka aiñ Meghalaya Regulation Gaming Act.
“Ha itu i por wym em yoh u pynman ya ka dorbar, ka sorkar da wanrah ko da ka Ordinance wa da mynjur da ka Cabinet, wei kattu daw hap won wow wanrah da ka Bill wa hap wow mynjur hapoh ka yung dorbar iwa da leh katni,” da pynche u Conrad.
Chooh chooh da ong u wa ka Ordinance ini wa dep da che bha ko tangwa katni wa da em dorbar da man ko i por wa biang yow pyndam noh ya kani ka aiñ Meghalaya Regulation of Gaming Act 2021.
Kam wow pynkynmoo wa hadien wa joor i pyrchah ya kani ka aiñ, ka sorkar Meghalaya ha ka 13-10-22 da pynmih ko da ka Ordinance yow pyndam ya ka aiñ Meghalaya Regulation of Gaming Act, 2021 kawa man ka aiñ wa da e bor wow booh leh ya ki Casino hapoh ka jylla.
Ka chnat Taxation da pynmih ko ya kani ka aiñ yow pait ya ki kaam yakhle hapoh ka jylla yow krehkaam noh ki hapoh ka aiñ.
