I piah hapoh ka Congress da chynna chooh chooh heiwa uwa yahkhmat ka Congress Legislature Party, u Dr. Mukul Sangma ynne ka sngi da ong u wa ka Party emkaam ko wow pynbait yei luti wei u yaklam u du wa ki heh na New Delhi.
U Dr. Mukul da pynyoo u yei wym sñiawsuk nadooh wa ki heh ka Congress da thung ki ya MP ka Shillong, u Vincent Pala kam u State President khlem da kynjoh ktien chwa ya oo.
“Em i ya klamsiaw hapoh ka Party wa emkaam da uwa na Ri-loom Khasi wa toh u man kam uwa yahkhmat ka CLP lada wan ka sorkar hei bor. Wei i pyrtuid u RG Lyngdoh toh iwa em hakhmat,” da ong u Dr. Mukul.
U Dr. Mukul da sñiaw u la kamwa chah chet kylla heiwa oo da yaleh u wow yoh yei kyrchaan kiwa boon ki Party ha New Delhi wa Kolkata.
Heiyatoh wa i lai u cha ka Kolkata ini wadep, u Dr. Mukul ym bien u wow ong iyi iyi leh hadien wa mih khubor wa lai yachem u wa ka Party TMC.
Hawa kylli hajrong ini, da ong u wa em lok u ha kyllieñ ki thaw hapoh ka jylla wa cha baar jylla.
Hawa kylli lada daw yaklam u wa u Pala yow pynbait ya iwon iwon i bakla, da jubab u deiwa ong wa ki bru wa biang u yaklam toh kiwa em ha Delhi yow pynbait luti.
Chooh chooh da ong u wa i pynbait luti toh i wow leh hapoh ka Party, wei neiliang yong oo ym pu kwah u wow ong iyi iyi leh kat wym pu biang i por.
Hawa klam yeiwa da wanrah, yeiwa da leh u neibynta ka Party, u Dr. Mukul da ong u wa da yaleh u wow wanrah yei suk i saaiñ hapoh ka jylla heipor yong oo wei da kreh chitom u wow pynku yei yoh i kot ka jylla.
Da ong u leh wa kam kiwa mihkhmat paidbah, toh u yaleh ki ya iwa boon yow wanrah yei ya sñiawthooh yei sñiaw yajan hapyrdi ki Khasi wa ki Garo wei iwi na i thong yong oo toh wow wanrah yei yatylli wei man kam iwi donhi.
