Shillong: Ka sorkar jylla ynne ka sngi da mynjur ko ya ka Interest Subvention Scheme wow yarap neibynta kitu ki warep kiwa chim ram lyngba ka Kisan Credit Card hapoh ka jylla.
Hawa klam hadien ka yalang yong ki Montri, u Conrad K Sangma uwa man leh u Montri Rangbah ka jylla, da pyntip u wa hadien wa da wanrah ya kani ka phang da ka chnat i rep i riang wa ka chnat muna poisa, ka sorkar ynne ka sngi da chim ko ya ka rai wow pynuiñ noh 2% ka sut, iwa mut wa ka sorkar u su hi ko ya ka sut (Interest) wa 2% yong kitu ki warep kiwa da chim ram lyngba ka Kisan Credit Card.
Da ong u wa ini i rai yong ka sorkar toh yow pynstiñ ya ki warep khamtam hadien wa da chah ktah na i wan yong ka khlam COVID-19, kiwa da hap wow su ya ka ram deilang waka sut.
Katkam wa pyntip u Montri Rangbah da em kamwa 1.60 lak ngut ki warep ha ka jylla kiwa da pynpsiah pyrtuid wow yoh yarap na katai ka ram, tangwa kamwa man kattæ kiwa da chim ya ka ram da em ki kamwa 19000 ngut.
Hawa kylli, da pyntip u wa ka sorkar daw hap ko wow pynlut kamwa T. 2.5 klur du neibynta uni u snem wow su ya katai ka 2%, wei ini ye ko wow ku ha ki snem ki wow wan cha ka T.3-5 klur neibhah wa ka sorkar dang pynchlur ko ya ki warep wow chim yarap lyngba ka KCC.
Ha iwi won i liang, u Conrad da pyntip u leh wa ka sorkar ynne ka sngi da rai ko wow kynthup lang noh ya ka Chief Minister Rural Development Fund kawa man T. 8 klur wa ka Chief Minister Urban Development Fund kawa man T. 4 klur ha ka Chief Minister Special Development Fund (CMSDF) ka wow man noh T. 12 klur, wei ini i rai yong ka sorkar toh yow pynsmat yei pynkrehkaam.
Katkam wa pyntip u Montri Rangbah, ya kini ki Scheme waroh chi kattu da pynkreh ha i pait yong ka chnat Urban Affairs wa Rural Development wei da chem wa baam por palat neidaw wa hap wow lai lyngba boon ki kyndon, wei deiwa kynthup lang ha ka CMSDF, ya kani ka Scheme daw pynkrehkaam bait noh lyngba ka Chief Minister Secretariat.
