Ka jylla Meghalaya daw yoh kawi na kawa heh dooh ka thaw e sumaar namo ki Medical Skills hapoh ka thaaiñ North East kawa daw chna ha West Garo Hills District hei dor wa T. 151.95 klur.
Ya ini da mynjur da ka dhab ki Montri namo ka Cabinet ynnin ka sngi hei pynlai u Montri Rangbah, u Conrad K Sangma.
U Conrad da pyntip u wa kani ka ‘Medical Skill Hunar Hub’ toh kawa da pykhat u sdang nadooh u snem 2020 yow em ya ka Medical Skill Centre neibynta kiwa kreh kam ki Paramedical wei ya kani ka thaw daw chna ha Babadam, West Garo Hills District.
Da khana u leh wa ka West Garo Hills toh du ka ka District wa chah jied ha itu i por wow yoh poisa naka sorkar pyrdi lyngba ka Minority Affairs. Tangwa nadooh u 2022, ini da kylla i wei waroh ki District daw ye ki wow yoh poisa na kani ka chnat.
“Nyngkong da paan i T. 282 klur neibynta kani ka thaw tangwa da hap wow pynkylla ya ki kattu katni heiwa ka chnat Minority Affairs da e ko T. 151.95 yow chna ya kani,” da ong u Conrad.
Da khana u wa i bhah toh 90:10 heiwa 10% na kani ka T. 151.95 klur daw e da ka sorkar jylla katwa ka T. 135 klur daw e da ka sorkar India.
Da pyntip u leh wa kani ka Hunar Hub daw e sikai ko ya 2,500 ngut kiwa lai puræ wei daw em leh ka Pharmaceutical College, ka Nursing College, ka Paramedical College wa kawi ka Skill Development Centre wei daw em leh ki Hostel.
Chooh chooh, u Conrad da pyntip u wa ka bhah nyngkong kani ka poisa da pynlait heiwa ka Engineering Project Ltd (EPL), kawa man ka Company sorkar kawa daw pynkreh ya kani wei da jied ya ka EPL hadien wa da pyndep ya ka ya thong yoh kreh heiwa da em leh sa ar tylli ki Company saorkar kiwa da yaleh.
