Hadien wa em kiwa pynpoor ya ka khubor ha ki Social Media yei dur ka chithi wa da pynmih da ka BJP Meghalaya kawa da ong wa man ko pyrchah yei lehkmen Valentine’s Day hapoh Meghalaya wei ka kyrchaan ko ya ka yurim ka Bajrang Dal hajrong ini wow pyrchah yei mih ki chi jur ki wym pu em bia wei daw pynchitom ya ki da ki wakreh ka BJP wei lada ka BJP yoh ko u chna sorkar hapoh Meghalaya daw pyndooh ko ya waroh ki rukom wa da pynbood yongton dei yong ki ri sep sngi.
Neiliang u President ka BJP Meghalaya, u Ernest Mawrie da kyntait u ya ini deiwa wa ong wa kani ka chithi wa da pynypoor ki bru toh kawa da chna thok wei neiliang ka BJP ym em pynmih ko ya kam kani ka chithi.
Da beiñ u leh ya kiwa pynmih ya kani ka chithi thok deiwa ong wa ka BJP ym em pyrchah ko ya kiwon kiwon ki lehkmen lane ki tamasa wei pdiang ko ya ki jait lehkmen neibhah e mynsien ko ya ka imlang sahlang wei kitu kiwa pynmih ya kani ka chithi toh kwah ki du wow chim kabu ha kam kini ki por wa em ka Election.
Da kdaw u leh wa da em wa leh yeini neidaw wa tieñ ki wa da ka-it bha ki bru ya ka Party katni wei da sdang ki wow wanrah yei pynsñiaw yaphær jaitbru ha kani ka Election.
Da ong u leh wa ka BJP da wanrah ko yei synchaar wa khooid hapoh India la 9 snem wa ha kiwi leh ki jylla wei ki liang pyrchah ym ye ki wow pdiang yeini neibhah ki heipor wa em ki hei bor da leh ki katwa ngait neibynta i myntoi yong ki hei thaw wow chakri paidbah.
Chooh choh da ong u wa ka BJP da pyndooh ko yei baamtooh iwa da ktah ya kitu kiwa da pynmih noh da kani ka chithi neibhah da tikna wa ka BJP daw yahkhmat ko ya ka sorkar wa thymme hapoh ka jylla.
Neiliang ka BJP da lai ujor ko leh da ka FIR ya kiwa pynmih ya kani ka chithi thok.
Ka BJP da e khublei Valentine’s Day ko leh ya waroh deiwa angood wa kani ka lehkmen daw wanrah ko yei kmen.
