Ka Seiñ Raij Tuber hei yahkhmat u R.H. Phawa, President wa u J. Sana, General Secretary wa kattu katni ngut ki dkhot da pynman ki yaka Committee wa jhan (Emergency Committee) wow pynrem joor ya u Living Rymbai uwa klam beiñ yaka Seiñ Raij Tuber heiyatoh waka leh niam Behdieñkhlam kawa pynman ynnin ka 19 tarik, heiwa u Living da thoh u ya ki kyntien wa da ktah ya ka Raij haka Facebook Group “Ka Sur u Paidbah”.
Ha katai ka Committee da chim yaka rai wow pynrem joor heiyatoh i beiñ niam yong u Living, khamtam yaka leh niam Behdieñkhlam ka Seiñ Raij Tuber. Katkam i rai yong ka Committee da dep wan booh ko leh yaka ujor FIR ha Lad-Rymbai Police Outpost, wei da e leh cha u Superintendent of Police ka East Jaiñtia Hills District wow leh yeiwa emkaam.
Hei thoh u Living uwa da booh deilang wa i dur Behdieñkhlam ka Seiñ Raij Tuber da ong u wa kam u Khasi uwa da man Christan, ka chnong Tuber to u kylla noh ko da iwi i yumut wa ym toh wow sah hei doom kamni deiwa chaad kam ki sniang kam ki blang…chi ehh ka niam mane syiar dang sah hei doom, deiwa ong u leh wa ya ki yungmane da khang katwa ya ki won laitlooid.
Ka Seiñ Raij Tuber da ong ko wa itai i thoh yong u Living da ktah ko yei sñiaw kiwa boon walang. Da wanrah ko leh yei ya sñiaw phær niam haphyrdi u waboon walang hapoh ka bri u Ynñiawtrep Ynñiawskum. I klam yong oo ye ko leh wow wanrah yei jia wa sñiawsih.
Ka Seiñ Raij Tuber lyngba ka kyrwoh na u President u R. Harvis Phawa, kyntu u wym hoi wow klam beiñ kynnoh kyntah ya kiwon kiwon ki niam yong ki jaitbru hapoh ka bri u Ynñiawtrep Ynñiawskum wa ha pyrthai hi waroh kawi, neibhah waroh ki niam wa em ha pyrthai sikai ki yeiwa bha suda ha i im ki bru. Waroh ki niam ha pyrthai em ki ka jooh ka thong wa kammon wow maya ya idæ hi, burom yaki para bru, wei kammon wow maya ya u Blai, tangwa yaphær hei ngait wei rukom leh donhi.
Ka Seiñ Raij Tuber kyrpaad jur ko katwa ye wa ki bor yong ka aiñ wow chimkhia yeini khnang yow lait na iwon iwon i jia wa sñiawsih, yow teh lakam leh ya kiwi tawon kiwa chim kabu. Heijooh i por wow pynchitom ya u Living katkam ka kyndon yong ka aiñ.
“Hawa bichar bha yei klam yong u Living, ym toh ka Tuber wa sah doom, toh oo wa dang sah doom. Jooh ong i ktien, lada kawi ka pariam kti kdaw ko cha kiwi kynmmoo wa sa soo tylli dong ki cha idæ hi.”
Puræ leh: Ym maap de ka Seiñraij Jowai ya kiwa klam beiñ ya ka Niamtre neini chakhmat
