U MLA warim ka Mawlai, u Embhahlang Syiemlieh uwa man leh kam uwa yahkhmat ka NPP da ujor FIR u pyrchah ya kitu kiwa pynpoor ya ki khubor thok pyrchah ya oo ha ki rynsan Social Media.
Ha kani ka FIR wa da e ha u Superintendent of Police ka East Khasi Hills, u Embhah da pyndait lang u wa ki dur ki dar wa iwa thoh ki bru iwa da pynpoor ha ki Facebook Page yong ka “Tei La Tynrai” wa “Ka Lympung Ki Khun Ka Ri”.
U Embhah ha kani ka ujor da ong u wa da em i thmu wow pynbood naam wei pyndooh burom ya oo deiwa thoh da ki jait pa ki jait ha kitai ki Facebook Page wei ym du ini, da em leh iwa da thoh iwa da thmu wow pynsñiawthooh bakla ya iyi wa da klam u.
Chooh chooh ha kani ka ujor, u Embhah da ong u wa da em ki kattu katni ki bru kiwa khwan myntoi kiwa da pynsñiawthooh bakla yeiwa da klam u wei ym em hi klam u yeiwa da thoh kini ki bru neibhah da ye u pynsakhiat lyngba ki laad pathai khubor wa da pynmih yeiwa klam u.
Kamtæ da kyntu yaka chnat pulit wow leh yeiwa emkam deiwa pynchitom ya kini kiwa da pynpoor ya ki khubor thok iwa da ktah yei long i man u kam uwa da chakri dei hok ya kiwa chong chnong ka jylla.
Ya kani ka FIR da booh haka 15 tarik uni u bnai.
Discussion about this post