Ka Hynniewtrep Integrated Territorial Organization (HITO), West Jaiñtia Hills District ynnin ka 8 tarik hapoh i yahkhmat u President, u Wanbiang Pulang da lai ujor ko cha ka yung krehkaam u Deputy Commissioner ka West Jaiñtia Hills wow khang ya ka yaaw masi wa em ha Mookyndur.
Ka seiñ hadein wa da thooh bniah ko yei mih syndet kani ka yaaw kawa da pynpoi ya ki masi wa ki mooid na baar yong ka jylla deiwa pynleh kamwa pynbiang ya ki kot ki sla tangwa katkam wa chem ka seiñ wa kani ka yaaw masi yaaw mooid toh kawa pyrchah aiñ neibhah ym em ki Doctor kiwa pynsakhiat wa ki masi wa ki mooid kiwa wan na baar toh kiwa da yoh tika namo ym em, wei ya kitai ki masi ym ye wow pyntikna cheiwon kit ki wei katkam wa tip ka seiñ wa kitai ki masi wa ki mooid da chalan cha Bangladesh khlem ki kot ki sla wei u tre yong katai ka yaaw da tyngkheiñ u leh yaka Rule 47 hadooh 56 yong ka Animals Transport Rules 1978.
Ya kani ka ujor, ka seiñ da phah Copy ko leh cha ka chnat pulit, Veterinary, Land Custom, Border Security Force wa cha u Chairman ka Animal Welfare Board of India, New Delhi yow leh ya iwa emkaam katkam ki kyndon wa da tyngkheiñ da kiwa pynlai ya katai ka yaaw.
Chooh chooh ka seiñ da ong ko wa na i por cha i por ki paidbah da ujor ki yei noh khiar ya ki masi ki mooid wa da yap hadooh wa kiwa ri mrad wa em chajan ym sñiaw chngaaiñ de ki neibhah ini em kani ka yaaw da pynartatein ya kiwa boon walang neibhah ym tip kitai ki masi wa ki mooid kiwa em ha katai ka yaaw toh kiwa man kammon neibhah wa ki kini toh kiwa wan na baar ka jylla, kamtæ hajrong ini waroh, ka seiñ da dawa ko wow khang ya katai ka yaaw.
Discussion about this post