Jowai: Ka seiñ Khasi Jaiñtia National Union (KJNU) lyngba u President yong ka u Niman N Shadap da ujor ki cha u SP ka East Jaiñtia Hills deiwa kam wa em ki bru hapoh ka chnong Lum Tongseng kawa em harood u sarokbah NH-6 kawa haap hapoh ka Elaka Narpuh wa chim kabu ki ya ki kynthai kiwa chong dai dukan ha ki tre dukan.
Katkam ka ujor da ong wa ki tre dukan da wai dukan ki chajan kani ka chnong wei da booh bru wakreh ki da ki khynthai khyllood hadooh kiwa wan na baar jylla kiwa da chah pynbor wow thiah kurim wa ki bru wa ym tipmit ki wei da chah maham ki wa lada pyntip ki cheiwon cheiwon daw chah pynmynsoo ki.
Kamtæ ka seiñ da ong ko wa katni kani ka thaw da man ko ka thaw dai kiad pyrchah yaka aiñ, i khayi ya ki kynthai iwa jia aw jan man ka sngi wei kini ki kynthai ym em wa yarap ya ki neidaw wa wan ki na ki manyung wa dooh wa duk kamjooh wa tieñ ko ya ki tre dukan kiwa maham ki.
Ka seiñ da kyntu ko ya u SP wow chimkhia u ya ini yow pyllait ya kini ki kynthai wei wow yada wow yarap ya ki.
Discussion about this post