Ka Ladrymbai-B Sports Club da booh ujor ko ha ka Meghalaya Cricket Association (MCA) pyrchah ya ka East Jaintia District Cricket Association (EJDCA) deiwa ong wa pynman ko ya ka yalehke Knockout Tournament 2026 deiwa khlem bood ya ki kyndon.
Ha ka ujor wa da phah cha u President ka MCA ynne ka sngi, da ong wa ini da jia i ha ka 20-05-26 ha ka yalehke Semi Final wa pynman ha madan Mookhep, East Jaiñtia Hills District hapyrdi ka Ladrymbai-B Sports Club wa ka Dein Chynrum CC heiwa da chem wa ka Dein Chynrum CC da pynyaleh ko da le ngut ki Guest Player kiwa da wanrah na baar ka District/League Player iwa man pyrchah ya ka Rule-16 ka EJDCA Rules & Regulations.
Deiwa em kini ki le ngut ki Guest Player, ka Dein Chynrum CC da jop ko ya kani ka yalehke da 12 Run deiwa rem ka Ladrymbai-B Sports Club.
Hadien ini neiliang ka Ladrymbai-B Sports Club da booh ko ya ka ujor ha ka jooh ka sngi heiwa ha ka 08-06-26 ka EJDCA da khut ko wow yaklam ha Dkhiah East tangwa ymtoh hapoh ka Office heiwa da pynman hapoh iwi i dukan deiwa emlang kiwa mihkhmat ki ar tylli ki Team kamjooh ki bru ka EJDCA tangwa neiliang ka Ladrymbai-B Sports Club ym bien ko wow pdiang yeini yaklam neibhah ym em leh ya ka deiwa toh rukom, wei ha ka jooh ka sngi da paan yei jubab deiwa thoh ha ka kot na ka EJDCA tangwa hadooh kattæ leh ym em yoh jubab.
Neidaw ini waroh, da booh leh ka ujor ha u DC ka East Jaiñtia Hills ha ka 15-06-26 yow dawa pynsangeh yei pynman Final kat wym pu pyndep ya ka takit tangwa heini i por wa dang yang yei wow leh u DC yeiwa emkaam, ka EJDCA da lai ko chakhmat wow pynbna lyngba ka WhatsApp Group yong ka wa ka Final u pynman hapyrdi ka Dein Chynrum CC wa ka Lumshnong Block ha ka 26-06-26 heipor 9:00 waje i step ha RBDCA Ground, Phahamsning Nongkhrah, Ri-Bhoi District.
Kamtæ da kyntu na ka MCA wow tuklar ko deiwa pyntikna wa da bood ya ki kyndon hawa pynman ya ki yalehke kamjooh wow pynsangeh yei pynman Final kat hadooh wa dadep pynman ya ka takit.
Discussion about this post