Ka Meghalaya & Greater Shillong Progressive Hawkers & Street Vendors Association (MGSPHSVA) da ujor ko ha u Chief Secretary ka jylla yei wym bien u wow pynkrehkaam ya ka chithi Letter no. D.O. No. K12017(30)/6/2020-UP-II-UD-Part(1) wa wan na u Secretary, Ministry of Housing and Urban Affairs, ka sorkar India kawa em yei tarik 18/05/2021.
Kani ka chithi toh kawa da phah ya waroh ki sorkar jylla yow pynkrehkaam ya ka aiñ ka sorkar pyrdi kawa tip kam ka, THE STREET VENDORS (PROTECTION OF LIVELIHOOD AND REGULATION OF STREET VENDING) ACT, 2014.
Ka MGSPHSVA da ong ko wa u M. S. Rao kam u Chief Secretary uwa man kam u Nodal Officer wa da thung da ka High Court ka Meghalaya yow pait yei pynkrehkaam heiyatoh kiwa chongdai cha rood sarok katkam ki aiñ wa em. Wei da yoo phylla wa uni u heh sorkar ym leh u yei kaam yong oo wei da leh u yei kaam wa man pyrchah ya ki paidbah.
Kamtæ ka seiñ da dawa ko wow pynkrehkaam ya kani ka aiñ, wow lum yukheiñ yei em kiwa chongdai rood sarok wei wow chna noh syndon ya ka Town Vending Committee deiwa em 40% kiwa chongdai rood sarok kam ki dkhot wa 10% ki dkhot na ki NGO wa ki seiñ imlang sahlang kiwa da krehlang wa kiwa chongdai charood sarok.
Kani ka TVC won i kaam ko toh wow e ya ki Vending License cha kiwa chongdai wa toh hok u yoh deiwa da tipmit lyngba i chim yukheiñ.
Ka seiñ da ong ko leh wa ki thaw wa jooh pynman yaw ha Shillong kam ka Khyndailad, Police Bazaar, GS Road, Bimola, Iewduh, Laitumkhrah, Polo, Jingkieng, Rynjah toh u em ki yei thaw wow chongdai katkam wa hoi wei wa chah da ka aiñ. Da ong u leh wa kam kini ki thaw chongdai toh u pynbiang ha kiwi ki chnong ki District.
Ya kani ka ujor da phah leh cha u Montri Rangbah ka jylla wa cha ka sorkar pyrdi.
