theme-sticky-logo-alt
theme-logo-alt
Advertisement ad1

Thang u Montri Rangbah ka Assam ya ki drugs wa chongdor T. 163 klur

U  Montri Rangbah ka Assam, u Himanta Biswa Sarma da chimbynta u ha ki soo tylli ki yalang nadooh ynnin ka sngi hadooh ynne ka sngi Bibar wow thang wei wow pynsih ya i durgs wa kiwi ki jait dih pynmuaid kiwa chongdor kamwa T. 163 klur kam i dak wow phah ya ka wyrta wa ym e laad yei drugs wa man pyrchah ya ka aiñ.

Ya ini da leh ha Diphu, Golaghat, Barhampur wa Hajoi wei da man ko leh kam chibynta ka thong krehkaam ka sorkar wa yahkhmat da ka Bharatiya Janata Party (BJP) kawa da poi biang hei bor ha u Naisan uni u snem.

“I khayi drugs man ko kam i kjut wei waroh kitu kiwa emkti toh u pynchitom ya ki. Ktah i ya ki khon khynroo, ki manyung wei wanrah i ya kiwa boon ki kaam wa sih ha ka imlang sahlang,” da ong u Sarma ha ka yalang wa pynman ha Barhampur ynne ka sngi.

“Nadooh wa chim yei kaam, da rai i wow yarap ya kitu kiwa da chah kdoh chah khoom hei dih drugs kamjooh kiwa hayung hasem yong ki. Wei iwa nyngkong dooh wa leh toh yow pyntkut noh yei khayi wei pynlai yaw ya ki drugs chapoh ka jylla wei wow yarap pynchait ya kitu kiwa chah ktah,” da ong chooh chooh u.

U Sarma da ong u leh wa nadooh ka 10 tarik u Naisan hadooh ka 15 tarik u Naiynñiaw, ki pulit da dep yaleh mukotduma ki ya 874 tylli hapoh ka aiñ Narcotic Drugs and Psychotropic Substances (NDPS) Act wei da kem ya 1,493 ngut kiwa dai drugs ha kylleiñ ka jylla wei ki drugs wa da yoh kem da chongdor ki kamwa T. 163 klur.

Ha ka 14 tarik uni u bnai, u Sarma da pyntip hapoh ka yung dorbar wa da yoh wow kem palat 27 kg i Heroin, 12,823 kg Marijuana, 41 kg Opium, 78,000 klong i dawai ky’oh, palat 1.3 Million kuli ki Sychotropic Tablets, 3 kg Morphine, 3 kg Crystal Methamphetamine, 3,300 kg Poppy Straw wa T. 1.80 klur ka poisa nadooh ka 10 tarik u Naisan.

Ynnin ka sngi, u Sarma da thang u 802 gm i Heroin, 1,205 kg u Cannabis, 3 kg Opium wa palat 200,000 tylli ki Psychotropic Table ha Golaghat iwa pynbood sa i thang ya 3.47 kg i Heroin, 11.88 kg i Morphine, 103 kg u Cannabis, 2.89 kg i Crystal Methamphetamine wa palat 200,000 tylli ki Psychotropic Tablets ha Diphu.

Ynne ka sngi da thang 10 kg i Heroin, 253 kg u Cannabis, 977 gm i Opium, palat 271,000 tylli ki Psychotropic drug ha Barhampur iwa da pynbood yei thang ya 3.2 kg Heroin, 1,015 kg u Cannabis, wa palat 35,000 tylli ki drug Psychotropic ha Hojai.

“Lada antaad i wa ini i drugs wa yoh kem man i 10% na kiwa pynpsiah chapoh Assam, ye wow ong wa ka yaw dai drugs ha Assam da chongdor ko T. 5,000 klur chi snem,” da ong u Montri Rangbah ynne ka sngi Bibar.

Share this:
Previous

Hiar bha ki kaam pyrchah aiñ ha ka Lockdown 2021 bar ha u 2020

Next

Ujor ka MGSPHSVA cha u CS yow dawa yei thaw yow chongdai