Uwa yap nei chah riñ bordiñ psiah u khlem da yoh bor chapoh ka Sub-Station: AT Mondal

U Montri ka chnat Bordiñ, u AT Mondal ynne hapoh ka yung dorbar chna aiñ da pynche hajrong i yap ki ar ngut ini wa dep hei chah riñ bordiñ.

U Montri da khana u wa iwi toh iwa da jia ya u Kyrshanborlang Muktieh iwa da jia haka 29-01-24 ha kawi ka thaw wa da dep kær ya uwi u Distribution Transformer yong ka Sub-Station kawa em cha wah yong ka Stage-I Umiam Dam neiliang timun.

U Kyrshanborlang toh uwa kreh kam u Security Guard waka M/s ITD Cementation India Limited wei da lai wei da psiah u cha kani ka Sub-Station khlem da pyntip wei khlem da yoh bor deiwa ieh ya ka thaw wa toh u pait u yang u wei da toh tba u ya u sainar bordiñ wa dang im.

Ka ITD Cementation toh kawa da kreh yow pynchna yaka yingkieñ wa em ha Dam Umiam wei ha kani ka jooh ka sngi wa jia da lai e FIR cha ki pulit ka Mawlai Police Station.

Related posts

Ka sorkar ymtoh kawa ye hi-eh ka KSP wow maham: Sniawbhalang

December 21, 2024

Da u waheh chnong uwa man leh uwa yahkhmat seiñbalang sai kyrtong MDC ka Namdong

December 21, 2024

Katkam ka takit da ki bru wa da thung da ka chnat Bordiñ da chem wa uni u bru ymtoh uwa kreh waka MeECL wei i thaw wa em uni u Transformer toh ha iwi i thaw wa em hajan iwi i khloo wa jngai na u sarok (GS Road) wei kani ka Sub-Station toh kawa da kær da ki nar chieh yow khang ya kiwa psiah khlem da yoh bor.

Heipor kamwa 4:00 waje i step ka 29 tarik da chem ya u Kyrshanborlang deiwa thiah yapler u ha itai i thaw wei da psiah u cha kani ka thaw khlem da yoh bor.

Ka sorkar da phah ko leh yaka ITD Cementation wow su ko lyngba ka Employee Provident Fund waka Insurance cha kiwa ha-yung u Kyrshanborlang.

Heiyatoh won wa iwa jia ya kawi ka manbei wa tip kam ka Edwina Lyngdoh Lyngkhoi kawa da khlaad hadien wa toh yooh ko ya uwi u sainar bordiñ, u Montri da pyntip u wa uni u sainar toh uwa pyndait wa kawi ka Mobile Tower iwa da jia haka 14 tarik ha Umran, Ri-Bhoi.

U Montri da pyntip u wa uni u sainar bordiñ hadien wa tyngkhooh u wa ki sla pachor wa ki chnat dieñ te lait u wei ka chnat da dep e FIR wei dang yang yaka takit wei ka chnat leh da pynman ko da ka yong ka hi ka takit.

U Montri pdiang u wa kiwa boon ki thaw wa em Transformer ym em kær ki neidaw wa duna poisa, ka MeECL leh ym ye ko yang u pait ya waroh ki Transformer tangwa da pyrkhat wa kitu kiwa em chajan ki thaw sah ki bru toh u kær wei kitu won ki chrot kiwa da sap sarah, ka sorkar leh chimkhia ko wow kylliang ki kut wa pyntip ki waheh chnong wa kiwi de.

Yeini da jubab u yeiwa kylli u MLA ka Mawlai, u Brightstarwell Marbaniang.