15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Uwa yoh COVID-19 ha Khliehriat toh u BM ka SBI

Advertisement ad1
Advertisement ad1
Advertisement ad1

Uwa yoh COVID-19 ha Khliehriat, toh u Branch Manger yong ka State Bank of India (SBI) uwa dang wan na Guwahati wei ym em pyndep u yaki kyndon, wei hajrong ini i lai lait yong oo, ka chnat i chait i khiah da ujor ko pyrchah ya uni u heh SBI.

U Director ka Health Services, u Dr. Aman War da pyntip u wa uni u wakreh ka SBI da wanpoi u hapoh ka jylla ha ka 28 tarik uni u bnai wei ha i por wa wan u da pynlait noh ya oo naka khyrdop kawa em ha Byrnihat hadien wa pynyoo u yaka ID Card, neibhah ki wakreh ha katai ka khyrdop ym poi pyrkhat ki wa u lai lait u deiwa mut wa daw leh u yaki Test wa iwa emkaam waroh ha Civil Hospital, Shillong.

Da pyntip u wa ki dorbar chnong ha East Jaiñtia toh kiwa paitbniah bha yei wan yong ki bru na baar wei hadien wa yoo ki ya utai u wakreh Bank, da pyntip ki wut wut cha ka yungkrehkaam u Deputy Commissioner, kiwa da lai chim yaki nongmuna na utai u bru wow thooh bniah wei hadien wa da yoh yaka Report da chem wa em u ya u COVID-19.

Neiliang u Alexander Laloo Hek u montri i chait i khiah da pyntip u wa utai u wakreh ka SBI ym toh uwa napoh ka jylla, wei wan u na Assam neidaw wa chah kyrriah kaam u. Da ong u wa ini i leh yong uni u wakreh ka SBi da pynkhyrngiat ko leh yaka sorkar wei wow paitbniah bha yaki bru kiwa thmu wow pyrchang wow lai lait naki kyndon wa da booh.

U montri da yaroh u leh yaki dorbar chnong kiwa da yakrehlang waka sorkar wow chem ya kiwa lai lait yaki kyndon.

Heiyatoh won wa uwa yoh ya u COVID-19 uwa yabi na u BSF, u Dr. War da ong u wa uni u bru toh uwa yah kari katai ka chnat chipai, uwa da lai kylleiñ nadooh Guwahati chadooh Lyngkhat wow kit ya ki chipai. Ka chnat dang thooh ko leh ya kiwi kiwa yachem wa uni wa yah kari.

Hajrong i man i long hapoh jylla, u Hek da pyntip u wa hadooh kattæ da em 52 ngut kiwa yoh ya u COVID-19 ha ka jylla, 42 ngut toh kiwa da chait, 9 ngut kiwa dang em ya uni khñiang wa kynthup 5 ngut ha East Khasi Hills, 2 ngut ha South West Garo Hills, 1 ha Ribhoi wa 1 ha East Jaiñtia Hills.

Da pyntip u leh wa kiwa da liwan chapoh ka jylla da em ki 19016 ngut.

Share this:
Previous

La 80% kiwa chait na u COVID-19 ha Mizoram

Next

Ympu ye ka sorkar u ong iwon iwon hajrong i thmu chna Police Outpost ka KHADC ha Langpih: Lahkmen