Ka Meghalaya da rem ko ha ka Manipur ha ka Vinoo Mankad Trophy da 4 Wicket ynne ka sngi ha Ranchi.
Kam wow pynkynmoo wa ka yalehke ka Meghalaya waka Mizoram ynnin da kut ko khlem yoh wow kawang chi bol leh neidaw u slap wei ynne leh da slem wow sdang ya ka yalehke deiwa hap pynduna ya ka yalehke cha mar 27 Over chiliang.
Hadien wa jop ya ka kylla khlem, ka Meghalaya da jied ko wow Bat nyngkong, heiwa da ye wow kamai awjan 5 Run chi Over deiwa haap lut ki Wicket ha ka 26.4 Over heiwa da kamai 132 Run.
Ka Meghalaya da wanrah ko arngut ki thymme kiwa Bat nyngkong ha kani ka yalehke, u Anmol Sunar (14) wa u Ayushman Das (24). Tangwa u Josiah Momin toh uwa da lehbha ya ka jylla uwa da kamai smat 34 Run na ki 26 tylli ki bol. Uwa bat heiwa ynru, u Rohit Yadav da yarap u da 22 Run.
Ka Manipur hawa kdong yei thong da sdang bha ko hadooh wa haap smat 2 tylli ki Wicket chwa wow kut iwa da e kyrmen ya ka Meghalaya. Tangwa da duna ware ki Run wow yada na ka Manipur kawa de ye u jop deiwa sah sa 4 Wicket wa 3.5 Over.
Soo ngut kiwa kawang bol kiwa yoh Wicket ya ka Meghalaya toh u Purav Agarwal (1/18), PM Santosh (1/26), Waldo A Sangma (1/28) wa u Bharat Gurung (1/31).
Ka yalehke wa khaddooh ka Meghalaya toh pyrchah ya ka Sikkim ha ka 4 tarik.
