U MLA ka UDP na Amlarem uwa man leh u Montri ka sorkar jylla, u Lahkmen Rymbui ynne ka sngi hajrong i pynyieñ kyrtong ka Party sa na ki ar tylli ki Constituency wow pynman ya ka Election chiteiñ samoi, da ong u wa ka Party ha ka 30 Naikhynde da yaklam ko hajrong ki kyrtong ka UDP wei katkam wa man hadooh ynne i step dang em du uwi u kyrtong na Mawphlang wei utæ toh u Eugeneson Lyngdoh uwa man u khon yong u MLA warim ka Mawphlang, u (T) SK Sunn katwa ya ki kyrtong na Rajabala wa Mawryngkneng hadooh ynne i step ympu chim ka Party ya ka rai.
Hajrong i sñiawskem heiyatoh wa kani ka Election, u Lahkmen da kyrmen u wa ki Party wa em ha ka sorkar toh u jop ki weiwa ka Mawphlang Constituency kawa da jooh jop da u (T) SK Sunn uwa da psiah cha ka Party kam u Associate Member, wei neiliang ka Party hadien i rai ka yung ka sem u Sunn da rai noh wow pynyakhun da u khon yong oo, u Eugeneson Lyngdoh.
Chooh chooh da ong u wa hanla u Eugeneson dang man u uwa dang thymme ha ka kaam Politics tangwa da man u kam u Role Model ya kiwa boon khamtam ha ka yalehke Football, wei da em u i kitkhlieh wow pyndep u yei kaamram u pa yong oo neibhah wa u Sunn uwa da man u kam u sur yong ka jylla ym du yong ka Mawphlang Constituency.
Heijooh i por u Lahkmen da ong u wa u Eugeneson da man u kam ka nuksa ya kiwi ki khynroo wa ymhoi u tieñ ki wow wan cha ka Politics neibhah da sñiaw yeiwa kynnoh ki bru ya ka Politics tangwa lada ki khynroo ym wan ki chaphrang kammon u man i? Kamtæ da kyntu u ya ki khynroo wa ki paidbah wow wan cha ki kaam Politics wow pynkylla ya ka ymtoh du dei klam wei kynnoh na rood, wei da kyntu u ya ki paidbah wow pynjop ya u Eugeneson Lyngdoh wei ka Party leh u kreh ko hajrong wow jop hi ui u kyrtong.