U MLA ka Jowai, u Wailadmiki Shylla ynne ka sngi heipor wa wan wai ya ka Renovation of Jowai Water Supply Scheme, da ong u wa da booh u ya ar tylli ki kreh wa dang sahteiñ na ki snem wa dadep wei i kaamram yong oo lada chah jied u toh wow pyndep ya ki, wei kini ki ar tylli ki kreh kynthup ki ya ka kani ka Scheme um wa i chna ya ka Market Complex ha Iawmusiang, heiwa da pynsñiaw u yei mynsien wa kmen wa da ye wow wai ya ka Scheme um ynne ka sngi.
Heiyatoh wa ka Iawmusiang, u Wailadmiki da ong u wa nadooh wa jop da lai u da ka jooh ka luti kamwa da leh ya ka Scheme saam um wow yaleh u yoh yarap na ka sorkar jylla, heiwa da em hadooh T. 70 lak tam wa sah ka yong u Contractor heiwa neiliang u Montri Rangbah ka jylla da kular u wow su ya kani ka poisa na ka yarong poisa ka jylla khnang wow lai bait i kreh wei mar dep su da sdang biang i kreh.
Ini i kreh da sangeh biang i na ki daw ki wymtip wei neiliang ka PWD leh da thoh (Reminder) ko dei langær cha u Contractor tangwa khlem yoh jubab na oo wei neiliang ka PWD da pyndam noh ko ya i kreh wa da e ha uni u Contractor wei da khut Tender biang.
U Wailadmiki da pyntip u wa hadien wa khut Tender biang neiliang uni u Contractor da e mukotduma u pyrchah ya ini, wei sahkut i kaam ha ka mukotduma.
Da kyrmen skem u leh wa ya ka Iawmusiang leh daw yoh u yoo kamwa ynne ka sngi deiwa wan wai biang ya ka neibhah oo kam u MLA ym em u chong thiahsngi u hajrong ini i kaam.
