Hadien wa pynmih hukum ka Meghalaya High Court wow sangeh chipor yei thung kreh ha ki chnat sorkar neidaw wym che heiyatoh wa i bhah neibynta ki jaitbru waphær waphær. Ka sorkar jylla da phah ko ya ka Chief Secretary wow thooh ya ki laad wow yoh u sdang biang i thung kreh.
U Symbood Montri Rangbah ka jylla, u Prestone Tynsong da ong u wa neiliang ka Chief Secretary wa ka sorkar dang kreh chitom ki wow pynlait ya kani ka hukum wei ym slem de daw phah ko yei jubab lyngba ka Affidavit cha kani ka Kasari wa khlieh dooh ka jylla.
Da ong u wa hanla ym em mynkna ya ka ‘Roster’ namo i bhah kreh cha ki jaitbru waphær waphær katkam i thung kreh, tangwa neiliang ki chnat krehkaam ka sorkar da pynkrehkaam bait ki ya ka aiñ bhah kreh namo ka Reservation Policy, deiwa pynrap leh wa hanla ka sorkar pynkrehkaam ko ya ka aiñ bhah kreh, tangwa ka High Court da phah wanrah ko ya ka Roster næ wow batai kammon bhah ya ki kaam wa lait.
Hawa kylli, da ong u wa ka sorkar ym chimpor ko wow phah ya ka dorkhat cha ka High Court, khnang wa i thung kreh ha ki chnat u man iwa lai bait wei i wym chah ktah.
Kam wow kdaw heini, ka High Court ha ka 5 tarik uni u bnai da pynmih ko ya ka hukum wa ka sorkar jylla toh u pynsangeh chwa ko ya waroh i thung kreh ha waroh ki chnat sorkar kat hadooh wa da pynbna deiwi tawon.
Ini i hukum ka yung kasari toh neidaw wa ki chnat sorkar ym em ki ya ka ‘Roster System’ namo wow pynyoo che katwon tylli ki kaam wa da man neibynta ki jaitbru waphær waphær katkam ka Reservation Policy, wei i rukom thung kreh daw ye wow sdang biang hadien wa ka sorkar da ye ko wow pynbiang ya kani ka Roster System.
