U MP ka Lok Sabha na Shillong uwa man leh u President ka Meghalaya Pradesh Congress Committee (MPCC), u Vincent H Pala da ong u wa i jhan ka sorkar wow pynbait ya ki thaw khappood wa ka Assam ymtoh sakhiat neibynta ki paidbah, tangwa wow myntoi ki kattu katni ngut ki heh spah ka Meghalaya kiwa thied ya kawi ka Hotel kawa em ha Khanapara.
Da ong u wa ya ki kot ki sla khyndaw neibynta kani ka Hotel da yoh na Meghalaya, katwa ya ka ‘Building Permission’ namo i yohbor wow chna ya kani ka Hotel da yoh ki na Assam, neibhah ha Meghalaya ym e bor ko ya palat 5 mala ki yung, wei hadien wa ki heh spah da thied ki ya kani ka Hotel da chim noh ki leh ya ka chnat pynroi sor na u Hamletson Dohling. Ya kani ka chnat da ekti wow pait da u Sniawbhalang Dhar, wei da pynkylla leh ya ka aiñ chna yung namo ka ‘Building Bylaws’ mar chimkti da uwi u Montri ya kani ka chnat, wei i jhan wow pynbait ya u pood leh toh hadien wa da chim noh ya kani ka chnat na u Hamlet.
Da ong u wa i soi ya ka soskular Memorandum of Understanding (MoU) toh leh khlem em kiwa sakhi. Da ong u wa ini waroh toh du wow pynbiej ya ki paidbah, wei lada kwah ki wow pynbait, kammon dang mih i kulmar, wei ini pynyoo i du wow biang ki kaam ki heh spah.
U Vincent da kubur u leh wa ka Congress ymye ko wow leh iwon iwon heiyatoh wa ki kaam pynbait pood tangwa da ong u wa katni won da mih chiboon i eh. Da ong chooh chooh u wa bar wow kular wei wow pynbiej paidbah lah deiwa dam u leh iwon iwon.
