7 ngut ki bru da dooh ki yei mynsien ki wei boon ngut kiwi da mynsoo ki hadien wa ka kawi ka Minibus da tyrrah ko mar deikhmat wa kawi ka Truck wa kit mar ha u National Highway-27 ha Tetelia, Sonapur ka Kamrup Metropolitan, Assam iwa da jia hei janmiet ka sngi Sunday wa dep.
Hadien wa jia ini da pynbaad wa toh neidaw wa sih wei boon thlu u sarok heiwa ha ka sngi wa bood da wan u Montri Rangbah ka Assam, u Himanta Biswa Sarma uwa da pynbaad leh ya ka National Highways Authority of India (NHAI) yeini wa jia.
Hadien wa jia ini, kiwa chong chnong deiwa chrai da lai ki wow khang ya ka Toll Plaza wa em hajan ini i thaw wa jia.
Katkam wa pyntip ki pulit, kani ka Minibus toh kawa wan neiliang Nagaon cheiliang Guwahati wei da tne ko ya iwi i thlu wa rap heh hadooh wym ye de uwa yah wow ksoh ya ka kari deiwa bait wei da lai tyrrah ya kawi ka Truck kit mar kawa wan mar pyrchah.
Hapoh kani ka Minibus da em 14 ngut ki bru wa kynthup ya uwa yah deilang uwa yarap ya oo. Soo ngut da yap ki pyn hapoh kari katwa ki le ngut kiwi da yap ki heipor wa chah sumaar. Kiwi ki 7 ngut da chah sumaar ki ha Gauhati Medical College and Hospital (GMCH).
Kiwa em hapoh ka Truck won ym em mynsoo ki.
Kiwa yap da tip kma u Idris Ali, ka Anima Deka Bordoloi, u Insan Ali, u Tafazzul Ali, u Gopal Das, ka Jyotika Ronghang wa u Prashanta Talukdar.
U Himanta hawa lai cha kani ka thaw da ong u wa ki paidbah da pynbaad ki wa joor boon i thlu tæ jia ini wei ki pulit leh hawa takit ki da ong ki wym em da pynchna yeiwa da sih da ka NHAI wei hap ko wow kitkhlieh yeini.
Da pynbna u leh yei yarap wa mar Rs. 5 lak cha ka yung ka sem kiwa yap.
Ki paidbah wa pynman yakhih da pynsangeh ki yei lai i wan ki kari da boon kynta deiwa yalang ki ya ka Sonapur/Nazirakhat Toll Gate, deiwa dawa wow sangeh yei khrong poisa kat wym pu dep u pynchna ya u sarok ha ki bynta ka Khanapara, Sonapur wa Jagiroad.
Hadien wa pynman kani ka yakhih, neiliang ki bor District da e por ki ya ka NHAI ynñiaw sngi yow pynchna ya u sarok.
Discussion about this post