Wa joor ka poisa ha Khliehriat wa ha Amlarem Constituency ye u dam yakhun ka Congress: Vincent

U Vincent H Pala, kyrtong ka Party Congress naka 5-Sutnga Saipung Constituency, uwa man leh u MP ka Lok Sabha wei kamjooh leh u President ka Meghalaya Pradesh Congress Committee (MPCC) hawa pynsñiaw yei man i long ka Party Congress hapoh ka jylla Meghalaya wei hajrong wa boon kiwa ong wa ka Congress da wiar ko, ynne ka sngi haka yalang pynskem Unit Block Congress Committee neibynta ka 5-Sutnga Saipung Constituency ha chnong Lamyrsiang, da ong u wa ka Party dang neh hi ko wei krehkaam ko kamwa jooh hi hadooh katni.

Ong u kamwa man kattæ naki 60 tylli ki Constituency, 55 tylli ka Party da dep pynkhreh kyrtong ko, wei em sa kattu katni ki Constituency wa joor i yaknieh Ticket khamtam cha Garo wei hapoh kani ka tayaw daw rai noh.

Napyrdi ki 5 tylli ki Constituency ong u kam ha Khliehriat wa Amlarem Constituency won neidaw wa joor ware i yaleh hapyrdi ka NPP waka UDP, ka Congress ye ko u dam pynyakhun, neibhah lada yakhun daw pynjop suk ko yei yi re yei yi, kamtæ u e laad ko yow rap pynlut poisa næ u noh poisa ki para ki.

Hawa e nongmuna ong u ka spah ka phaw yong ka Constituency Sutnga da kjit da ki Politician ka Khliehriat waka thaaiñ War uwa man u Home Minister ka sorkar jylla.

Related posts

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

“Ka Constituency wa joor poisa, lah u ya pynlut poisa ki, wei ka poisa toh kawa khrong ki na kiwa dooh wa duk, na kiwa kit saroo, kit kwai, kit jhoor, kiwa khih mooyong, moochuni, na kiwa kit Masi wei na kylleiñ ki Gate wa booh haka jylla, wei nga jooh ong oo kini toh ki ATM ka sorkar,” da ong u Vincent.

Hawa pynsñiaw ya ki kyrtong wa ka Congress da pynkhreh ko, ong u ha Ri-Bhoi, ha East Khasi hapoh Shillong wa ha Garo Hills, waroh ki Constituency da dep pynkhreh, lait noh ha Jowai neidaw wa u kyrtong wa da chaniah ki dam u heipor wa tbian kamtæ dang hap pynbait.

Da kob haroh u wa em hadooh kamwa 37 tylli ki Constituency hapoh ka jylla wa i yakhun toh ka Congress wa kiwi ki Party, neibhah em ki Constituency wa mih da ki sahep sorkar naki chnat krehkaam waphær, kiwa sikai haki College, ki khynroo wada pyndep yei puræ waphær kiwa da ieh ki yei kaam yow mih yakhun Election naka Party Congress.