U Montri wa pait yaka chnat puræ puthi ha ka jylla, u Lahkmen Rymbui da pyntip u wa yei pynkreh neibynta ki 40 tylli ki Eklavya Model Residential School hapoh ka jylla da yoh da ki Company wa na baar neidaw wa em ka khlam COVID-19 heiwa ki Company sorkar napoh ka jylla ym em yoh ki wow lai chibynta wow yaleh yow yoh ya ini i kreh.
Da ong u wa ka jylla da pynkhreh ko wow booh 40 tylli ki Eklavya Model Residential School hapoh ka jylla, wei na kini, 2 tylli i kreh toh kiwa lai chakhmat, kitæ ha Samanda, East Garo Hills wa ha Pahamsyiem, Ri Bhoi District, katwa ya kiwi da pynkhreh ya ka Detailed Project Report wei i jied ya ki thaw dang lai i chakhmat.
Ynne ka sngi neiliang u MLA ka Congress na Mawsynram, u Himalaya M Shangpliang da kylli u hapoh ka Yung Dorbar hajrong kiyi wow kreh ya ki EMRS hapoh ka jylla.
Hawa jubab ya iwa kylli, u Rymbui da pyntip u wa na kitai ki 40 tylli ki skur, i pynkreh da e cha ka chnat puræ puthi ka jylla lyngba ka Engineering Cell 2 tylli, 13 tylli da yoh wow pynkreh da ka Water and Power Consultancy Services Ltd. (WAPCOS), wa 25 tylli da e wow pynkreh da ka Manipur Industrial Development Corporation Ltd. (MIDC).
Hawa jubab chooh chooh ya iwa kylli pynrap, hajrong wym yoh yong ki Contractor wa ki Company na ka jylla Meghalaya wow pynkreh ya kini ki skur, u Montri da ong u wa ya ka Expression of Interest (EOI) ym toh wa khut da ka sorkar jylla wei kani toh kawa khut da ka National Education Society for Tribal Students, wei heitai i por wa khut ya ka EOI, ka jylla em ko hapoh i pynrkhiñ kyndon wow yada na ka khlam COVID-19, iwa da pynman wa ki bru na kani ka jylla ym yoh ki wow lai chimbynta ha ka EOI.
Katkam wa pyntip u Rymbui, u Montri Rangbah ka jylla, u Conrad K Sangma da thoh u cha u Montri wa pait ya ka Ministry for Tribal Affairs ka sorkar pyrdi kawa pait ya ini i kaam yow kyntu wa ya i kreh ya ki EMRS toh wow e i ha ki Contractor ka jylla, tangwa hadooh katni, ka Ministry ym pu phah ko yei jubab.
