Wa ki umkhmat wa joo u waheh chnong da wai paidbah ya ka yingkieñ doi-doi ha Ialong

Ynne ka sngi, u MLA ka Jowai, u Wailadmiki Shylla da wan wai u ya ka yingkieñ doi-doi namo ka Suspension Foot Bridge kawa lai najrong ka Wah Myntdu ha Umladong Khloo Yirngam, Ialong ha ka yalang wa man ha Madan Ait Dkhar heiwa u EM ka JHADC u Phasmon Dkhar da man u kam u symbood kongsan.

Ya kani ka yalang da pynlai da u Masan War uwa man u Secretary ka chnong Ialong heiwa da yoh ya ki kyntien pdiang burom na ka Shimti Pale.

U Waheh Chnong ka Ialong u Ram Phawa hawa e ya i klam wa ki umkhmat wa joo wa dap u dei mynsien wa kmen wa da ye u wai ya kani ka yingkieñ heiwa khana u wa kani ka yingkieñ man ko i kyrkhu ya ki paidbah ym du ya ki warep tangwa wot ya ki paidbah wa wan uiñke suwari cha ini i thaw. 

Da khana u leh wa ya kani ka yingkieñ da chna hei lut iwa T. 65 lak heiwa ka chnong da pynman ko ya ini i bynta Umdalong kam ka Fish Sanctuary.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Ya i kreh wow chna ya kani ka yingkieñ da yoh poisa lyngba i yarap na ka yung krehkaam ka Thadlaskeiñ C&RD Block, West Jaiñtia Hills kamjooh i pynlang poisa na kiwa chong chnong wei i kreh ya ka da sdang i nadooh ka 2 tarik u Thohlakhmi (Feb) 2016, tangwa da sahkut i chipor. 

U Phasmon hawa e yei klam da yaroh u ya u waheh chnong uwa da booddien ya kani ka kreh deiwa e khublei ya ka chnong wa da khut ya oo kam u symbood kongsan.

Da ong u leh wa kani ka thaw man ko kawa pynngaad neibhah lada em ki bru hei chrai manda hiar ki cheini daw wiar lut i chrai yong ki deiwa pynrap wa lada yoh waheh chnong bait kam uni da stiñ i kaamram kiwa mihkhmat paidbah.

Neiliang u kongsan, u Wailadmiki Shylla da yaroh u ya ka chnong hapoh i yahkhmat u waheh chnong, neibhah lyngba ka Scheme Chispah Sngi da ye u wanrah chiboon ki kaam pynroi ha ka chnong deiwa yaroh leh ya i tylli ka chnong waroh kawi.

Da kyrpaad u leh ya kiwa chong chnong wow pdiang sñiawbha ya kiwa uiñke suwari wei wow man ki kyllooid mynsien.

Kiwi kiwa da klam ha kani ka sngi toh u Dr. Brightstar Langbang, u BDO ka Thadlaskein, u F. Basan, Project Director ka DRDA katwa ya ki kyntien khublei da e da u Juhhi Pale uwa man u Asst. Waheh Chnong ka Ialong.

Ya kani ka sngi da pynphooh da ki chaad yong ki khynnah na ki skur waphær waphær wa kiwi de kiwa na Ialong.