Ka Congress hapoh ka jylla ynne ka sngi da ong ko wa i wan tlep ka poisa da pynmylliñ noh i ya ki paidbah ya ki mat wa ktah ya ka jaitbru iwa da wanrah yei chah pynrem ki kyrtong yong ka. Heiwa ka Ampareen Lyngdoh da ong ko wa da yoo yeiwa kreh i bor ka poisa ha kani ka Election.
Da e khublei kyrpang ko leh ya kiwa kitkaam wa kiwa kyrchaan ya ka Congress hanla da kreh bha ka bor poisa tangwa ym em u ngop ki wei da yieñ skem ki ha ka yurim wa skem wei wow e kyrchaan wa pura ya ki kyrtong ka seiñ hanla rem ki leh.
Chooh chooh da ong ko wa ki kyrtong ka Congress da chah pynrem ki tangwa katkam ka Result wa da mih, da sakhi wa ka Congress hanla em ko ha ka Liang Pyrchah tangwa ym em u rem tput ko khamtam hawa tip ya ka poisa wa da theh kawa da joor bha neiliang ki kyrtong ki seiñ wa em ha ka sorkar.
Ka Ampareen da ong ko wa i rem da 1,900 næ 1,800 Vote ymtoh i rem tput tangwa i rem wa khian wei ini pynyoo i wa hanla i bor ka poisa da kreh bha i tangwa kiwa kyrchaan ka Congress ym em u khih ki.
Da ngait skem ko wa ha u snem 2023 i yaleh u man i iwa yoosuk neibhah hanla jop kiwa em ha ka sorkar tangwa i jop u man i iwa khian deiwa pynrap wa i daw wa chah pynrem toh neidaw wa yut seiñ ki MDC wa mihkhmat ya ka Mawphlang, u Lamphrang Blah wa u Ashahel D Shira wa yakhun na Rajabala wei neiwa mih noh uwi na ki heh ka Congress ha Mawryngkneng.
Ha iwi i liang ka Ampareen da ong ko hawa synchaar ka poisa ymye wow ong iyi wow jia, tangwa kam ka seiñ da yaleh ko wow pynkhlan wei wow pynbait ya ka seiñ wei da yang i maa ya ka jaitbru nei krehkaam ware ka poisa. Da ong ko leh wa da toh i por wow booh chwa ya ki mat wa emkaam heipor wa jied ya u kyrtong.