Ynne ka sngi u kyrtong MLA ka Congress na Narttiang Constituency, u Emlang Laloo da thap pyrtuid u kam u kyrtong ha kani ka Election MLA 2023.
Hadien wa thap pyrtuid, neiliang u Emlang hawa yaklam wa kiwa pathai khubor da ong u wa da ieh u ya i kreh sorkar deiwa chim ya ka Voluntary Retirement Scheme (VRS) ha u Naitung (Apr) 2022 hadien wa yoo u wa ka Constituency em ko hei eh i khor ha kiwa boon ki liang.
Da ong u wa ki kaam pynroi ym em de ko ha ka Constituency heiwa boon ki warep emkaam ki ya ki bru wow yasaaid neibynta yong ki wei oo samen leh kam uwa kreh wa ki warep yoo u yeini i chitom ki warep tæ chim u yei chong ngiah nei kaam sorkar wow kreh neibynta yong ki warep.
Da ong u leh wa ym em de i yoh kreh yoh khih ha District wa ka jylla hi waroh kawi wei ymtoh du wow yoh kreh sorkar ki tangwa wow ye ki u yieñ ha ki kjat yong ki hi.
Chooh chooh da ong u wa ki warep ymjooh yoh pura ki ya ki symbe wa ki sboh tæ rai u wow yakhun neibynta yong ki.
U Emlang uwa jooh man kam u sahep ka chnat Soil & Water Conservation, da ong u wa hei yoo yong oo, du ka seiñ Congress hi wa yoo yei dooh i lut ki manyung wa duna hei yoh i laa katkam iwa oo leh sñiaw u.
Da kdaw u leh ya kiwi ki Scheme kam ka baam ja-sngi namo ka Mid Day Meal wa myntoi ki khynnah waroh khamtam kiwa dooh tangwa kam itu i baam wa e ki ym em wa bien u baam.
Heijooh i por da ong u wa ka Congress da dap ko 137 snem kattu wei da man ko ka seiñ kawa da yakhun ya i laitlooid ka ri wei kawa e ya ka jylla kawa da wanrah leh ya ki kaam pynroi.
