Shillong: Kiwa thoh khubor ka nongbah Shillong ynne ka sngi, ki da chim ki ya ka rai wym thoh khubor (Boycott) ya ka dorbar mang tyngka yong ka Khasi Hills Autonomous District Council (KHADC) neidaw wa ka Council ym pynbiang ko ya ki kot ki sla wa yatoh waka mang tyngka.
Ka KHADC ka da wanrah ko ya ka mang tyngka yong ka Council ynne ka sngi nyngkong kawa man ka sngi sdang yong ka Dorbar mang tyngka wei ya ka mang tyngka da wanrah da u Deputy Chief Executive Member u Pyniaid Sing Syiem.
Kiwa thoh khubor kiwa lai pyllang khubor ya ka Dorbar yong ka KHADC ynne ka sngi da sah ki hei doom neidaw wa kyntait ka Council wow e ya ki kot ki sla wa yatoh wa i klam waiphang yong ka Mang Tyngka (Budget Speech) wa wym jooh jia mynnu mynnu leh.
Barabor kiwa thoh khubor da yoh chwa ki ya ka kot ya iwa klam waiphang hajrong ka mang tyngka wow yoh puræ wei wow booh dak ya ki phang kiwa emkaam tangwa haka ha ka sien wa nyngkong, da kyntait da kiwa kreh ka Council wot hapyrdi i lai paan wow pynsñiawthooh ya ki.
Kiwa kreh ka District Council ki da kyntait ki wow e ya ki kot ki sla deiwa ong wa ym pu ye u e katwa ym pu wanrah ya ka mang tyngka hapoh ka dorbar.
Hanlada kiwa thoh khubor da pynche ki wa emkaam ki wow yoh du ya ka Budget Speech ym ya ka Budget Book, kiwa kreh ka Council ym ap ki.
Discussion about this post