U Moonlight Pariat, u kyrtong wow yakhun yaka Election MLA 2023 naka 2-Jowai Constituency uwa ksoh leh heijooh i por kam u District President ka UDP West Jaiñtia, ong u wa ka UDP Jowai Circle man ko thij kam ka kynthai wa miat, neibhah hadien wa dadep pynriam pynmiat dur wei pynbih yaka da iwa sñiawbang, da hær i kylleiñ soodong hadooh wa kiwi won ki bru wa nabaar da yoosuk ki ka wei rah ktien ki kylleiñ soodong ka Constituency wa u Bah Hep da dooh Ticket u.
“Kani toh ka luti wa lai ka Congress kiwa da yut naka, da wan kam ki yaka UDP, nga kam uwa em hapoh yung wa u Secretary toh ki wow e i mynjur yaka Ticket wym kiwa nabaar ka yung wow wan li kam,” ong u Moonlight Pariat hawa klam ynne ka sngi haka yalang pynskem ya kiwa ksohkaam ka Primary Unit ka UDP Jowai Circle.
“I dadep pynphooh pynpheiñ i ka, kiwi tawan da wan kam ki dei thmu u pynbiej ya ki paidbah. Kani toh ka pyndooh burom don hi neibhah da kam haroh ki wa da dep thied O yaka Ticket UDP wot hawa ka Party wymtoh kawa dai Ticket.”
Heiyatoh wa i e Ticket yaki kyrtong, u Moonlight ong u wa ka UDP em ko yaka Election Committee ka wow chim yaka rai neibynta u e Ticket, tangwa phylla kammon nud kiwa em wa thok wa da yoh ki ya ka Ticket ha kti hawa wot yaka Election Committee wym pu em chna ne boi yoh kiwa da kam wa da yoh da yoh ki daka Ticket thok.
Heijooh i por ong u ka UDP wym jooh kbai ko cha yaw wow e Ticket yei yi yei yi tangwa manda poi i por ka lai ko katkam ka luti wa toh u lai.
