Hajrong i pynbaad wa em i tih mooyong wa i chalan mooyong pyrchah yaka aiñ wa kam da ka liang pyrchah katæ ka Congress, u Montri Rangbah ka jylla u Conrad Sangma da ong u wa ka sorkar da bood ko yaka kyndon wa da booh da ka Supreme Court waka National Green Tribunal (NGT).
Da ong u wa ki kynhun wa da booh da ka NGT toh kiwa dang im hi wei lada em kiwon kiwon ki kaam pyrchah yaka aiñ daw wanrah ki ya ini chakhmat.
U Conrad da ong u wa ka liang pyrchah ha iwi i por ong ko wa ym em utæ u mooyong wa 32 lak Metric Ton ha Meghalaya tangwa hadien won da ong ko wa da pynslem wow dai lilam noh ya uni u 32 lak Metric Ton.
“Nyngkong ka liang pyrchah toh u tip ko iyi klam klam ki. Ym miat ya ki wow ong chitbet deiwi. Ini pynyoo ko yei kulmar wa em ha ka liang pyrchah,” da ong u Montri Rangbah.
Da ong u leh wa ka kaam wow lialm dang lai ko chakhmat nadooh wa chimkti ka sorkar yong oo.
“Da lai i cha ka Supreme Court yow pyntikna wa i khang wow tih mooyong da pyndam yaka heiwa ka Supreme Court da chah ko wow lilam ya u mooyong wa 32 lak Metric Ton deiwa booh yaki kyndon wa hap wow bood khlem da mylliñ,” da ong u Conrad.
Katkam wa ong u Conrad, iwi na ki daw wa slem toh wa ka sorkar ka bood ko yaki kyndon wa da booh da ka Supreme Court waka NGT wei wow pyntikna wa da bood ya kini.
Da kdaw u leh ya sa iwi i daw wa yatoh wow kit ya u mooyong na i thaw wa tih cha i thaw lai li booh (Depots) kiwa toh u pait daka Coal India Limited wei wa hap leh da ka sorkar.
“Kini waroh da booh ko yei eh yaka sorkar neidaw wa ka sorkar ym em leh ko ya ini wow kit ya waroh uni u mooyong na i thaw tih lane i thaw wa em u cha i thaw wa toh u pynhaap,” da ong chooh chooh u Conrad.
Da pyntip u leh wa ka sorkar daw sdang noh ko ym slem de wow lilam hanla ym pu ye u leh ha waroh ki District.
