Ka Hynniewtrep Youth Council (HYC) seiñbei da pynsñiaw ko wa smat ko wow e buit biang hawa yatoh waka Meghalaya Residents Safety and Security (Amendment) Bill 2020, hadien wa kani ka aiñ da chah pynuiñ ko ha ka Ministry of Home Affairs (MHA) ka sorkar pyrdi.
Ka HYC ynne ka sngi da lai paan pynche ko na u Symbood Montri Rangbah wa pait ya Kaam Poh-Yung ka jylla, u Prestone Tynsong hajrong ka yurim wa ka sorkar India da pynuiñ noh ko ya ka MRSS Amendment Bill.
Hawa klam wa ki laad pathai khubor, u President ka HYC, u Roykupar Synrem da khana u wa ka sorkar ha ki kajiak sngi wow wan daw khut biang ko ya waroh kiwa embynta nadooh ki seiñbhalang wa kiwa yahkhmat chnong wow ya phyllu hajrong kani ka aiñ wa da pynkhreh, wei heijooh i por da ong u wa ka seiñ da paan ko leh ya ka chithi wa da phah da ka MHA wa kyntait ya kani ka aiñ wa da mynjur da ka yung dorbar chna aiñ ka jylla.
Katkam i ong u Synrem, da pyntip cha ki wa i daw wa ka MHA da e ko toh hajrong i booh khyrdop wow kynreh ya ki baar jylla lyngba katai ka aiñ wei ka MHA da kdaw ko wa ki aiñ ka sorkar jylla ymtoh wow ya tyngkhooh ki wa ki aiñ ka sorkar pyrdi.
Neiliang ka HYC da yaklam leh hajrong i dawa ya ka Inner Line Permit, wei da khana u wa ka seiñ da klam che wa katwa ympu yoh ya ka ILP, emkaam ya ka aiñ kam ka MRSSA wow pynkrehkaam yow khanglaad ya ki bru wa na baar wow psiah khiar ki cha kani ka jylla.
Hawa yataoh waka MRSSA 2016 kawa ka sorkar da sdang ko wow pynkrehkaam ha ki kattu katni ki bynta yong ka nongbah Shillong, u Roykupar Synrem da ong wa kani ka aiñ ym ye ko wow khanglaad næ wow kdoh u khoom yei wan ki bru kiwa na baar, tangwa daw ktah ko leh ya ki tre chnong kiwa wan chongwai ha Shillong.
Puræ leh: Phah pynuiñ ka MHA yaka MRSSA Bill, daw hap chong pyrkhat biang ka sorkar
Discussion about this post