Ka seiñ kiwa chet-ja sngi ha ki skur wa kynthup ya ka All Jaiñtia Mid-Day Meal Workers and Labour Union wa ka Union of Cook Cum Helper PM Poshan ha ka yalang wa da pynman ki ha ka 10 tarik uni u bnai ha Jowai da pynsñiaw ki yei em kyrmen hajrong ki mat dawa wa sahteiñ yong ki na ka sorkar pyrdi neibynta u pynku ya ka bhah wa e ko na ka Rs. 900 cha ka Rs. 9000 chi bnai wei heijooh i por leh wow pteiñ ya ka PM Poshan.
U Adviser ka seiñ, u Khroo Lamsalanki Pariat khana u wa i daw wa em kyrmen ki wow mankaam kani ka mat dawa toh wa u CM ka Meghalaya, u Conrad Sangma, u MP Rajya Sabha, u James Sangma wa u Lahkmen Rymbui uwa man kam u Montri ka chnat puræ puthi ka sorkar jylla leh da e ki dei thoh cha u Pralhad Venkatesh Joshi, Union Minister Education ka sorkar India heiyatoh wa ki mat dawa ka seiñ.
Najrong i kyrchaan u Conrad Sangma, sñiawkmen ki leh wa ha ki sngi wa dadep wot u Himanta Biswas Sharma kam u CM ka Assam leh da phah chithi u cha ka seiñ kiwa chet-ja skur yow e khublei hajrong i yakhih yong ki ya kani ka mat wei wow klam leh neibynta ka thaaiñ chaneiñ mihsngi waroh kawi.
U Himanta da pyntip u cha ka seiñ wa hei sakhiat ka bhah i su yong ka sorkar India cha ki jylla waphær waphær da toh hok hi u pait sylli noh hapoh i yahkhmat u Narendra Modi kam u Prime Minister kamwa ka sorkar pyrdi leh dang pynkhreh ko katni ya ka PM Poshan Scheme.
Chooh chooh u K.L. Pariat ong u wa em ki i yooluti wow mankaam toh wa da chimkhialang kiwi leh ki heh sorkar wot cha baar jylla ka thaaiñ mihsngi neibynta u yaklam u kyrpaad na u Prime Minister ka ri yow pynku u ya ka bhah.
Heijooh i por yooluti u wa u Prime Minister deilang ki Minister ka Union Cabinet leh u chah chkoor ki yei kyrpaad ka seiñ kamwa ka seiñ da e ko dei thoh nadooh u 2022, weiwa ha ki 20 snem wa da lai ym em de i pait i sylli yaka thaiñ mihsngi deiwa neh beit Rs. 900 chi bnai ka nong wa e da ka sorkar pyrdi.
Discussion about this post