Hajrong ka yurim yow thooh bniah yei daw wa kylla rong suiñbneiñ ka wah Lukha wa em ha East Jaiñtia Hills District, iwa da jia neipor cheipor. Ynne ka sngi neiliang ki dkhot ka Committee on Environment yong ka yung dorbar Meghalaya Legislative Assembly wa kynthup ya u Chairman u S.K.Sunn uwa man leh u MLA ka Mawphlang, ki dkhot u H.M. Shangpliang MLA ka Mawsynram, u Comingone Ymbon, MLA ka Shangpung wa u G.S. Swet da hiar lai pait, lai sylli ki yaka wah Lukha haki artylli ki thaw wa kai ko hei bynta ka chnong Sonapur wa ha chnong Brishyrnot, wei da riñ dur na suiñ haroh da u Drone yow yoo wa kammon lai ka wah wei heiwon i bynta kylla rong ko.
Heini i lai sylli ka Environment Committee da emlang leh ki Scientist napoh ka Central waka State Pollution Control Board, nalor u DC ka East Jaiñtia Hills u E. Kharmalki, u ADC u S.S. Syiemlieh wa kiwi.
Nyngkong da hiar ki ha Sonapur i thaw wa chynna bha yei kylla rong ka wah, wei neini won da lai ki cha Brishyrnot hei thaw watip kam ka Khadtlang neibhah wa heini sdang i yachem hapyrdi ki artylli ki wah kitæ ka wah Lunar wa ka wah Lukha.
Ki Scientist wa wan hiar lang cha kani ka wah da khana ki wa da jooh chim ki yaka nongmuna (Sample) kani ka um na kani ka wah Lukha wei hei thooh bniah da chem ki wa joor bha ka Acid, wei i daw wa ar wa pynman yaka wah u kylla rong ko toh wa chem ki wa em chwa palat (High Content) u Aluminium Silicate hapoh ka um, wei neini i daw manda dat ki kjat sngi haka um da pynyoo ko hei khmat yei kylla rong yong ka um.
Hajrong ini u H.M. Shangpliang pynsñiaw u yei lyngngoh wa kammon ka wah ha Brishyrnot heithaw wa yachem waka wah Lukha, ka wah Lunar stem ko, katwa rap chawah won ha Sonapur kylla rong suiñbneiñ ka um.
“Neini i daw dawa wei ekti haka State Pollution Control Board waka Central Pollution Control Board wa toh u thooh bniah bha ki deiwa chim yaka nongmuna ka um na waroh ar ki thaw, ka wah Lukha kawa wan na Khaddum waka nongmuna yong ka wah Lunar, yaka Report u e ki cha ka Committee khnang yow sñiawthooh neibynta u pynche cha ki paidbah,” ong Shangpliang.
Chooh chooh u S.K. Sunn da pynrap u deiwa ong, i kamram yong ki Pollution Control Board wow pyndep yei thooh bniah, wei lada jia wa ka Environment Committee ym hun ko yaka Report yong ka Central waka State Pollution Control Board ye ki wow dawa dei takit wa laitlooid hajrong kani ka wah.
