Ha ka 3 tarik uni u bnai, ka Cadenza School of Music Shangpung da yoh ko u wai paidbah sa kawi tawon ka thaw e sikai sa ha chnong Mukhap heiwa ya ka yalang wai da pynlai da u Timing Roy Lakhmie uwa man leh kam u Rangbah Balang yong ka Balang Presbyterian Khliehmushut Moolibang Shangpung.
Ha kani ka yalang da ya emlang leh ki dkhot ka Executive Committee yong ka Music School, neitæ u Waheh Chnong ka Chnong Mukhap, u Rangdajied Lapasam wa kamjooh u Secretary ka Yaseiñ Khynroo ka Balang Presbyterian Mukhap, u Rimiki Niang wa kattu katni ngut kiwa yahkhmat ka chnong wa kamjooh leh kiwa yahkhmat ka Balang Presbyterian Mukhap wei ya ki kyntien pdiang wa tbian ha kani ka sngi da pachat da Timing Roy Lakhmie.
Da yoh leh yei klam iwa tbian na u Principal ka Cadenza School of Music Shangpung, u Kenneth Anderson Iakai uwa da klam heiyatoh wa i lai luti ka Music School yong oo, wei nyngkong da pynsñiaw u yei sñiawngooh ya u Blai neibhah wa da yah luti u yaka Music School la 7 tylli ki snem wei dap ki leh dei mynsiem iwa sñiawkmen khamtam hawa ka Music School yong oo da yoh biang ko u wai sa kawi tawon ka chlem e sikai kawa em ha ka chnong Mukhap hadien wa da dep wow wai ha ka chnong Mihmyntdu dang ha u snem wa da dep.
Chooh chooh u Kenneth da ong u leh wa i daw wa pynman wow booh ya ka skur yong i put i tem, i rwai i siaw ha ka chnong Mukhap toh wow pynsuk ko ya kiwa puræ kiwa chong wa sah ha kani ka thaaiñ neibhah wa da jngai ko ya ki wow wan ki chadooh cha Shangpung wei kamjooh leh sa ka bai kari kawa sy’at wei ym du itæ, u Kenneth da ong u leh sei wi tawon i daw toh wa ki bei ki pa ki khynnah dang chem chitom ki wow li booh ya ki khon yong ki neibhah kiwa boon hi ki khynnah kiwa wan chah sikai toh kiwa hei rta iwa 15 snem chapoh, iwa da man i daw iwa kongsan wow pynman ya oo wow seiñ ya kani ka skur i put i tem neibhah yoo u wa ha kini ki sngi man ko kawa eh hadooh kattæ kattæ wow yoh khih yoh kreh khamtam i kreh sorkar.
Katwa kamtæ kani ka Music School pait ko ya ki khynnah kiwa purae wei lehbha ha ki Exam yong ki heiyatoh waka Music deiwa yarap kylla won ya ki deiwa thung kreh ya ki wow man ki kam kiwa sikai wa pura ha kani ka thaw.
Ha kani ka sngi da yoh leh yei klam iwa tbian na u Waheh Chnong ka Mukhap uwa da pynsñiaw yei kmen hadooh kattæ kattæ heiwa ka Cadenza School of Music Shangpung da ye ko u seiñ sa kawi tawon ka chnat e sikai hapoh ka chnong wei kam ka chnong hi ym em u poi pyrkhat ko wow wan kam kani ka chnat krehkaam neibhah ha ka chnong Mukhap hi ka put ka tem ka rwai ka siaw dang duna bha ko lada kyruiñ ha waroh ki liang kamtæ kyrmen u lyngba i em kani ka Music School ki khynnah khynroo kynthai wa chynrang u yoh ki wow puræ u chah sikai neibhah kamwa da yoo wa ha kini ki sngi boon na ki khynnah haap ki ha ki kam sih kaam roi wa kamjooh leh chah khoom chah kdoh ki ha ki kor ki bor yong ka Mobile tangwa lyngba i wan ka Music School u ye ko u pynkylla ya chiboon kiwa sih cheiwa bha lada man i ha ka imlang ka sahlang wa kamjooh leh heiyatoh wei roi i ku ha ka chnong ka thaw.
Kam ka dak wow wai paidbah ya kani ka Music School da em chwa i duwai pynkyntang da waroh hapoh i yahkhmat ka Ruhipaia Iakai.
Ya ka yalang ha kani ka sngi da pynkut lyngba ki kyntien e khublei wa da pachat da u Timing Roy Lakhmie wa kamjooh i duwai kyrkhu pynwai iwa da e da u Rimiki Niang.
Discussion about this post