Ka Nongjngi Para-I Cluster Level Federation (CLF) ha ka 28 tarik uni u bnai da poi ko sa cha uwi u moomær heiwa da yoh ko wow sa wai ka Livelihood Service Centre (LSC) kawa thymme wa em ha Nongjngi.
Ka thong yong kani ka Centre toh u man ko kam ka thaw hapyrdi wow pyndap wow pynbiang ya kiwa boon kiwa emkaam nadooh ki mar ki mata kamjooh ka thaw wow e sikai wei wow yahluti ya kiwa em khih em khan.
Ya ka yalang wai da pynlai da ka F. Khonglah kawa man kam ka Cluster Coordinator (CC) Farm Livelihood, deiwa emlang ka E. Pale, President kawa da e yei klam pdiang burom.
Da wan sakhilang u Assistant Engineer, u A. Tariang kam u kongsan uwa da ong wa emkaam kam kini ki jait thaw wa yahkhmat da kiwa chong chnong yow pynku ya ka kamai kajih kam kiwa im cha palatsor.
Da wan wow sakhi leh da kiwa kreh ha MSRLS na ka District Mission Management Unit (DMMU) wa na Block Mission Management Unit (BMMU) kiwa da wan neiliang ka sorkar yow pynyoo yei kyrchaan ya kini ki seiñ chnong.
Neiliang kiwa yahkhmat chnong kiwa da embynta da baan joor ki yei emkaaam i ya krehlang ka CLF wa ki bor chnong.
Hapoh kani ka Livelihood Service Centre ye wow yoh ki symbe, ki sboh, ki dawai mrad, ki dawai rep, ki baam mrad wa ki wi de. Da yooluti wa kani ka Livelihood Service Centre daw ye ko wow leh ki kaam wow pynkhlan ya ka khayi pateiñ deiwa ye wow pynyoh ya ki mar wa emkaam deiwa smat cha ki dkhot ka Cluster Level Federation kamjooh leh ya kiwa chong chnong hi waroh.
Discussion about this post