Ynne ka sngi, ka chnong Panaliar Jowai, da wai pûnem burom ko ya ka Indoor Sports & Games Complex yong ka, kawa em ha Kperlyngktuiñ Parliar, heiwa u MLA ka Jowai Constituency, u Wailadmiki Shylla, uwa man leh u Montri sorkar uwa pait ya ka chnat Sports & Youth Affair wa da man u kam u kongsan, katwa u Khroobok Passah, Assistant Director Sports & Youth Affairs Department kam u symbōd kongsan.
Da em ka yalang tbian wa pûnlai da u Waheh Chnong, u Riquoma Rq. Laloo heiwa da yoh leh yei Ngōhblai na u Jait Dao Sumer, Chairman ka Local Committee ka chnong.
Da yoh yei khana tbian wa lai luti ka chnong nawa sdang hadōh wa yoh u wai ya kani ka Indoor Sports & Games Complex na u Samehi Laloo, Secretary Local Committee uwa da ong wa nawa sdang kani ka thaw daman ko kawa thûlli, wûm em iyi iyi, kawa u Tûnrawde u Newel Shallam da e sñiawbha u ya ka Club Panaliar. Ki waheh nachwa, da chûnna jngai ki, wa emkām u chna da ka skur kawa da em hapoh Yungwalieh ka chnong yow kyrriah cheitæ.
Da lai ki snem hadien wa ka chnong da pûnman ko ya ki Fete na ki snem cha ki snem wei dayoh u chna yei yungskur harōd madan bol ka chnong. Neitæ, itæ i thaw da chah ieh biang i, khlem pûnemkām.
Kamtæ, ha u snem 2019 da mih i pûrkhat na ka chnong wa, datoh u thōhlad u chna da ka Indoor Hall yow yoh ki khon ka chnong u pûnlut yei por yong ki deiwa yalehke Sports heitæ.
Ha u snem krehkām 2020-2022, dayoh u tûmpra yei yungskur wei houjōh hi u snem da pûnyieñ ya ka Indoor Hall heitæ. Ki kām daphet ki chakhmat, da thōhlad wow yoh yarap poisa na ki wabōn ki liang. Chibōn i pûnlut ha katai ka Indoor Hall dayoh neiwa mih na ka Fete wa da pûnman kûrpang yeibhah itai hi i thmu. Dayoh leh na ki khon ka chnong da ka poisa wa da ki tiar. Da yarap leh na ki Scheme waphær waphær, na u Sniawbhalang Dhar, uwa man katni kam u Deputy Chief Minister 5,00,000; na ka Office u Governor Rs. 7,00,000 hei yahluti u Antonio Lakiang; na u Wailadmiki Shylla Rs. 5,00,000 wa na u Dr. Wanweiroy Kharlukhi, MP Rajya Sabha Rs. 10,00,000.
Ki kûntien kûrkhu kûrdoh wei banjōr ya waroh ki wow wan yalehke ha katai ka Indoor Hall wow pûnman ya ka, kawa khōid wapliah da yoh na u Khroobok Passah uwa da ong leh wa neiliang ka Sports Department leh u thōhlad hi u yow yoh u yarap ya ka chnong Panaliar. Ong u, kûnmō wa ya u jhōr wa thied phi, poi ha yung hap sait hap pûnkhōid, yow chet deiwa hun yow bām, manda bām, yow yei u yeidoh i pran yong i. Kamjōh kani ka Indoor Hall leh, chwa u yaleh Sports ha ka, toh u man ko kawa khōid yow yoh i doh i pran wa chait wa khiah. Neiliang yong ō leh, da kûntu jōr u, yow kongsan yow yarap katwa ye ya ka chnong Panaliar, kawa man ka chnong wa sah wa chong u.
Da wai pûrda yow Mōsahkûnmō da u kongsan hadien neitæ da e u yei klam deiwa ong u wa neiliang yong ō pathan chibōn ki bûnta da yaleh u wow yarap ya ka chnong Panaliar, iwa hakhmat katni wow pûnbait you pōd wa ka MCH, ka chnat wa em ha kti yong ō hi katni. Heiwa u yaleh u katwa ye walah u pûndep ha kini ki sngi.
Da kûntu u ya ki khon ka chnong yow chim ya kani ka kabu, hei wow kûntu kûnrong ya ki kām yalehke Sports.
Neiliang yong ō, da yaleh u wow yarap u pûnbha pûnmiat ya ka madan Football ka chnong leh, heijōh i por chibōn ki kām pûnbha hapoh ka chnong. Da ong u emkām toh i yakræhlang chirup wa kiwa pûnlai chnong yow ye u pûndep yeiwon iwon iwa damut damang, heiwa neiliang yong ō, da kular u wow e yarap Rs. 10 lak yow pûnbiang pûntoh ya ka Indoor Hall.
U Marryngkat Syngkon, General Secretary ka chnong Panaliar Jowai, da e u ya ki kûntien e khublei.
Discussion about this post