Ka Madanrting da man ko ka nyngkong dooh ka Census Town ha Meghalaya ka wow yoh myntoi na ka Mahatma Gandhi National Rural Employment Guarantee Scheme (MGNREGS). Kam chibynta ini, neilliang u Lambor Malngiang, MLA/MDC, Nongkrem Constituency da wai u ya u moo yurim hajrong ini ha ka yalang wa pynman da ka Dorbar Chnong Madanrting.
U Malngiang hawa e yei klam da ong u wa da poi cha ini toh deiwa kreh chitom wei booddien waka sorkar jylla waka sorkar pyrdi. Deiwa wan kani ka Scheme da ong u wa daw yarap wow pynyoh khih 100 sngi ha chi snem wei daw yarap bha ko wow pynskem yei yoh i laa ki bru kani ka thaaiñ.
Chooh chooh da ong u wa kani ka Scheme daw yarap ko leh ya ki manyung mansem wow pynlang poisa wei wow chna ya iwa emkaam ka chnong ka thaw kamjooh leh wow kreh pyn hajan yung jan sem.
Deiwa ya krehlang ki Scheme kam ka Pradhan Mantri Awas Yojana waka Swachh Bharat Mission, kiwa yoh myntoi kattu daw ye ki leh wow yoh ya ki yung ki sem wa paka ki wym syad dor u chna, ka um kor wa ki paikhana. Da ban joor u leh wow sdang ki kynthai ya ki SHG. U Malngiang da kyntu ya ki paidbah wow wan ki chakhmat wow chim kabu ya ini wow pykylla dur ya ka Madanrting.
Neiliang ka I. Laloo, Deputy Commissioner, East Khasi Hills da pyntip ko wa ki 29 tylli ki Census Town ha East Khasi Hills District toh kiwa daw em noh hapoh ka Mahatma Gandhi National Rural Employment Guarantee Act (MNREGA) wei da em 260 tylli ki jait kreh wa ye u pynkreh hapoh kani ka Scheme deiwa pynchlur wow chim kabu yow pynkylla dur ya ka sor kawa da man kawa khynnia katni.
Kiwi de kiwa klam toh u Latiplang Kharkongor, MDC, Nongthymmai Constituency wa u P. T. Passah, BDO Mylliem C&RD Block.
