Shillong: U Hamletson Dohling, MLA ka Mylliem Constituency uwa man leh u montri ka sorkar jylla wa pait ya ka chnat Urban Affairs, ynnin ka 21 tarik da wai pyrda u yaka lympung yalehke Football kawa tip kam ka ‘8th Mylliem Lum Football League Tournament 2019’ kawa pynman da ka Mylliem Lum Sports Association (MLSA) ha ka chnong Khatar Mer.
Ha kani ka yalang wai pyrda da sakhi leh yaka chaad pyn-wyrngia na ki khynnah. Wei da em 16 tylli ki dhab wa chim bynta ha kani ka lympung yalehke wei ki yakhun da pynman ha kylleiñ ki madan yalehke yong ki khatle tylli ki chnong waphær waphær ka Mylliem Lum.
U Hamlet Dohling, uwa man leh u Chief Adviser ka MLSA, hawa e u yei klam yong oo da ong u wa i thmu wow sdang yaka ka MLSA toh wow kyntu ya ki khynroo ha ki kaam yalehke wei ka MLSA leh da pynku ko ya ka kyrdan yong oo wei da yoh u ya i maya wa i kyrchaan.
Da kyntu u leh ya kiwa yalehke wow yait na ki myllien wa sih yow ye ki u pynyoo yei sap yong ki.
U Hamletson Dohling ha kani ka sngi da saam u leh ya ki Jersey cha waroh ki 16 tylli ki dhab wa ya chimbynta ha kani ka lympung yalehke bol khnang wow yoh ki u pynemkaam ha kani ka lympung yalehke.
Ha ka yakob March Pass ki skur kiwa chim bynta toh ka St. Peter Higher Secondary School Rangbihbih (kawa rah ya i naam jop) ka Mawwan LP&UP School, ka Mawiong Presbyterian UP School, ka Pomkaniew LP&UP School, ka Lamjingshai Secondary School, Khatar Mer, ka Rama Krishna Mission Secondary School (Boys) (kawa yoh wa ar), ka Mylliem wa ka Rama Krishna Mission Secondary School (Girls), Mylliem.
Ha kani ka sngi da em leh ka yakob Drill Display wei ka St. Peter’s Higher Secondary School, Rangbihbih da yoh ko yei nam wa jop katwa ka Mawwan LP&UP School da yoh rah ko yaka kyrdan kawa ar. Ya ka yakob March Pass wa Drill Display da bichaar da ki sahep pulit na ka 1st Battalion ka MLP.
Hawa kyruiñ cha ka yakhun wai pyrda ya ka lympung ka Umlympung 12 Mer Sports Club da jop ko yaka Mawnarian SC (kawa jop ya kani ka lympung ynnin ini wa dep) da 2-1.
Discussion about this post