Sohra: Kam chibynta ka chi bnai wow pynkrehkaam yaka Rashtriya POSHAN Maah (National Nutrition Month) hajrong ka phang “Every Household a Celebration of Nutrition and Behavioural Change”, da pynman ya ka POSHAN Mela da ka Block Convergence Committee, Shella Bholaganj C&RD Block deiwa ya krehlang wa kiwi ki chnat ka sorkar wa em hapoh ka Sohra Civil Sub-Division ha Khliehshnong Community Hall, Sohra ha kani ka 20 tarik wa da dep.
Ya kani ka Mela da wan wai da u A.S. Mukhim, MCS, BDO, Shella Bholaganj C&RD Block, Sohra. Heiwa da wan sakhi lang da ki khynnah skur wa kiwa sikai ki skur wa em haka thaaiñ Sohra, ki wakreh Anganwadi, ki SHG, ki Doctor na CHC, Sohra, ki sahep wa ki wakreh ka yung krehkaam u Block Development Officer, Shella Bholaganj C&RD Block, ICDS, PHE wa kiwa yahkhmat ki chnong ki thaw. I thmu kani ka Mela toh wow pynsñiawthooh paidbah yow baam ya ki jait baam wa tei yei doh i pran khamtam ya ki kynthai wa punkhon, ki manbei wa ki khynnah.
U A. S. Mukhim hei klam yong oo da ban joor u yeiwa emkaam wow baam ya ki baam wa pynchait pynkhiah khamtam ya ki khynnah wa kynthai. Deiwa ong leh wa ki baam wa baam i ktah ko ya ka chait ka khiah, kamtæ emkaam u baam ya ki jait baam wa em iwa emkaam i doh i pran yong i yow wanrah yei kylla yei chait i khiah ka imlang sahlang, wei yow poi cha kani ka thong emkaam i ya krehlang waroh ki chnat sorkar. Da klam u leh yei emkaam i wow man kiwa leh khooid ha i im i man ka sngi.
Neiliang ka B. Hek, Child Development Project Officer (CDPO), Shella Bholaganj C&RD Block da batai ko chaphang ka Rashtriya POSHAN Maah deiwa ong wa ya kani ka program da sdang da u Prime Minister ka India, u Narendra Modi haka 08-03-2018 da ka thong wow pynduna yei chitom wa ktah yei heh i san ki khynnah, i wym biang baam, i duna khia ki khonboo heipor wa kha wa i kjut duna snam.
Ha kani ka Mela da em leh chiboon ki dukan wa pynyoo rong kam na ka chnat CDPO, Agriculture, Horticulture, PHE, Health, Education wa kiwi kiwi. Ki warep kiwa krehlang waka NESFAS kiwa wan na ki SHG wa boon hapoh ka Shella Bholaganj C&RD Block da wan dai ki ya ki mar rep wa pynmih ki khlem da pynemkaam ya ki sboh dawai wa chna da u bru.
Discussion about this post