Ka Medusind kawa man ka karkhana IT na USA kawa man leh kam ka ITES Healthcare Organization, da wai ko ya i yung krehkaam wa thymme yong ka ha Shillong ha ka 14 tarik uni u bnai heiwa da wan wow embynta da u Montri Rangbah, u Conrad Sangma deiwa emlang u Kranti Munje, CHRO wa u Ninad Chavda, CFO ka Medusind.
Kani ka yung krehkaam toh kawa da booh hapoh ka Shillong IT Park.
U Conrad da kmen u wow yoo wa ka Medusind da thung kreh ko ya chiboon ki khynroo ka jylla wei da wailaad ko ya ki khynroo na ka sor Shillong wa ka jylla hi waroh kawi deiwa ong wa kyrmen u wow wan chooh kam kini ki karkhana hapoh ka jylla.
Ka Medusind toh kawa em ha kylleiñ ka ri India wa ha USA, kawa e kreh ya chiboon ki khynnah khynroo kamwa 4000 ngut ha kylleiñ ka ri wa ha USA.
I wanrah ya kani ka yung krehkaam ha Shillong toh neidaw wa em chiboon ki khynroo na ka thaaiñ mihsngi kiwa da biang wei khamtam kiwa na Shillong kiwa da stat yow yoh kreh pyn chajan chnong ki.
I wai yung krehkaam ka Medusind ha Shillong pynyoo i yei angnood kani ka karkhana wow poor cha kiwi ki thaw ka India. Kani ka karkhana du hapoh 6 bnai da thung kreh ko hadooh 450 ngut kiwa napoh Meghalaya.
U Kranti Munje da dap u dei mynsien wa kmen wow yoh u wai ya kani ka yung krehkaam ha Shillong deiwa ong wa kiwa kreh toh kiwa da ku bha i sap yong ki. Da ong u leh wa ki da jied ki ya kiwa kreh na kiwa boon ki jaitbru deiwa kyrchaan ya kiwa chong chnong wa da booh yung krehkaam ka Company.
Puræ leh: Wai ka [24]7.ai yaka yung krehkaam BPO wa thymme ha Shillong Technology Park
