U MDC ka Congress na Mawhati Constituency, u Charles Marngar da beiñ u ya ka sorkar jylla hajrong i kheiñ stiñ ya u pood u ang, hadooh wa ka sorkar Assam da yohlaad ko wow wai syndon yaka Stadium ha ka chnong Umlaper kawa em ha Block II, wot hapyrdi i yaklam pynbait pood wei ym pu toh u em iwon iwon i kreh kaam pynroi.
Da ong u wa ye u man wa ini toh neidaw wa pynjem palat ka sorkar Meghalaya næ ye wow em iyi iyi cha lyndet neibhah kiwa mihkhmat kiwa em ha ka sorkar ym ong ki iyi iyi, neibhah kiwa chong chnong da pynsñiaw ki yei sñiaw rem wa i sñiaw diaw hajrong ini i leh ka sorkar. Da ong u wa lada man kamni i rukom, ym sñiaw man chaniah de ya ka sorkar, næ ka sorkar toh u chim ko ya ka luti wa kam ini ym toh de wow jia.
Katkam wa pyntip u Charles, ka sorkar Assam ynne ka sngi da wai paidbah ko ya kawi ka Stadium ha ka chnong Umlaper kawa haap hapoh ka Block II, wei ya kani ka Stadium da wai da u MP ka Lok Sabha na Karbi Anglong, u Horen Sing Bey.
U Charles da pyntip u wa hadien wa da tip yeini i leh ka Assam, da pyrchang wow Phone cha u Montri Rangbah, u Conrad K Sangma tangwa ym yoh wow yaklam wei hadien da phah noh u dei thoh yow kyntu ya u Montri Rangbah wa toh u tuklar syndon syndon. Da pyntip leh wa da yoh wow yaklam wa u Symbod Montri Rangbah, u Prestone Tynsong uwa da kular wow yaklam wa ka sorkar Assam.
Da ong u wa katkam wa yaklam wa ka Deputy Commissioner ka Ri-Bhoi wa ka Deputy Commissioner ka West Karbi Anglong ha ka 26 tarik Naisaphra, da mynjur wym pynkreh ya kiwon kiwon ki kaam pynroi na waroh arliang wei wow burom bait ya ka ‘Status Quo’, tangwa kamwa da yoo ynne, ka sorkar Assam da leh embor ko ha katai ka thaw neidaw wa ka Meghalaya ym yohlaad wot u pynyieñ ya u chrot bordiñ næ wow pynkrehkaam ya ka Jaal Jevan Mission kawa toh ka Scheme ka sorkar pyrdi.
