U Montri ka sorkar pyrdi uwa pait ya ki Kaam Pohyung kamjooh ya ka Cooperation, u Amit Shah da wai u ya kawa nyngkong dooh ka MBBS Course hei ktien Hindi hapoh ka ri ynne ka sngi ha Bhopal, Madhya Pradesh deiwa emlang u Montri Rangbah ka Madhya Pradesh, u Shivraj Singh Chouhan.
U Amit Shah hawa e yei klam da ong u wa kani ka sngi toh ka wow sahkynmoo ha ki kaam sumaar ha uni u snem ka Azadi ka Amrit Mahotsav wei daw thoh chaphang kani ka sngi da ki dak ksiar. Da ong u leh wa kani man ko leh kam wow pynthymme ya ki kaam puræ puthi hapoh ka ri hadien wa da wanrah ya ka Education Policy wa thymme deiwa kheiñkor ya ki ktien, ki thylliej tynre wot ha ki skur Primary, Technical wa Medical.
Da ong u wa u Prime Minister Narendra Modi da khut u yow e sikai ha ki Medical wa Engineering College wow sikai da ka ktien Hindi, Tamil, Telugu, Malayalam, Gujarati, Bengali wei ka sorkar Madhya Pradesh deiwa yahkhmat u Shivraj Singh Chouhan da man ko kawa nyngkong wow pynmankaam yei thrang u Modi.
Da kdaw u leh wa ha uni u spah snem wa 21 emkaam wow pynneh pynsah ya kiwa stat hapoh ka ri wei da sdang leh wow pynman ya ka JEE, NEET wa UGC Exam ha ki 12 tylli ki jait ktien ka ri. Kamjooh leh ya ka Common University Entrance Test da pynman ha ki 13 tylli ki ktien wei ha ki 10 tylli ki jylla da sdang wow e sikai ya ki Engineering Course ha ki ktien Tamil, Telugu, Marathi, Bengali, Malayalam wa Gujarati.
Da ong u leh lada ye u lai puræ hei ktien yong i hi daw yarap bha ko ya kiwa lai puræ wei yow pynwiar leh i sñiawrem pyn yei ktien yong idæ. Da e nongmuna u ya u Modi uwa da klam dei ktien Hindi ha ki rynsan yong ka pyrthai.
Da khana u leh yei pynkylla ya ki thaw puræ (Technical & Medical Education) heiwa ha u 2014 da em 387 tylli ki Medical College katni da ku cha 596 tylli kamjooh ki MMBS Seat da ku na 51,000 cha 79,000 tylli. Da jooh em 16 tylli ki IIT tangwa katni da em 23 tylli, da jooh em 13 tylli ki IIM katni won 20 tylli, da jooh em 9 tylli ki IIIT katni won 25 tylli. Ha u 2014 da em 723 tylli ki University katni da ku cha 1,043 tylli.
