U Montri ka chnat Agriculture & Farmers’ Welfare, u Banteidor Lyngdoh da wai u ya ka ‘Bio-fertilizer Production Unit’ ha ka yalang wa pynman ynne ka sngi ha State Biological Control Laboratory, Upper Shillong.
Hawa e yei klam, neiliang u Montri da e khublei u ya ki wakreh ka chnat Agriculture yei kreh chitom ki wow pynmankaam yei angnood ki warep ka jylla. Da ong u leh wa ini toh u moomær ya ka jylla Meghalaya kamjooh ya ka chnat Agriculture & Farmers’ Welfare wei man ko leh kam wow lai chakhmat deiwa rep da ki sboh wa khlem dawai yow man ka jylla kam ka Organic State.
Da ong u leh wa kamwa man kattæ da man iwa eh wow pyndap yeiwa emkaam sboh ki warep ka jylla kamtæ kani ka thaw pynmih sboh namo ka Bio-fertilizer Production Unit toh i sdang yow pyndap ya iwa duna. Da pynchlur u leh ya ki khynroo kiwa da biang ka kyrdan puræ puthi wa kiwa seiñ khih wow chim ki ya kani ka kabu wei wow ya krehlang waka sorkar wow pynmih chooh ya kam kini ki thaw pynmih sboh ha kylleiñ ka jylla.
U Meghalaya Farmers’ Empowerment Commission Chairman, u K N Kumar, da pyntip u wa kani Bio-fertilizer Production Unit toh kawa nyngkong dooh wa da booh hapoh ka thaaiñ Northeast da ka sorkar.
Da pyntip u leh wa ha Meghalaya i emkaam sboh ha chi snem toh 22,000 Metric Ton tangwa hapoh ka jylla da ye wow pynmih du 150 Metric Ton chi snem. Da kyrmen u wa ha ki snem wow wan deiwa ya krehlang wa ki bru samen daw ye wow pynmih chooh chooh kam kini yow pyboon yei pynmih sboh yow pyndep yeiwa emkaam ka jylla.
Kiwi de kiwa klam toh u CVD Diengdoh, Secretary Planning Department, u SC Sadhu, Secretary, Agriculture & Farmers’ Welfare Department, ka R. Majaw, Director of Agriculture, Dr. D. Thakuria, Professor, CAU, Umiam wa kiwi de.
